പാറശാല : പാസോ മറ്റ് രേഖകളോ ഇല്ലാതെ അനധികൃതമായി അതിര്‍ത്തി കടന്ന നാല് തമിഴ്നാട് സ്വദേശികളെ അമരവിള ചെക്പോസ്റ്റ് എക്‌സസൈസ് അധികൃതര്‍ പിടികൂടി പാറശാല പോലീസിന് കൈമാറി. തമിഴ്നാട്ടില്‍ നിന്ന് ഇടവഴികളിലൂടെ കേരളത്തില്‍ എത്തിയവര്‍ കോട്ടയത്ത് നിന്നെത്തിയ കാറില്‍ കയറി യാത്ര ചെയ്യവെയാണ് ചെക്പോസ്റ്റില്‍ പിടിയിലായത്. പാറശാല പോലീസ് എത്തിയെങ്കിലും ആരോഗ്യ വകുപ്പ് അധികൃതരുടെ നിര്‍ദ്ദേശത്തെ തുടര്‍ന്ന് ഇവരെ അതേ വാഹനത്തില്‍ തന്നെ കളിയിക്കാവിളയില്‍ എത്തിച്ച ശേഷം തമിഴ്നാട് ചെക്പോസ്റ്റ് കടത്തി വിടുകയായിരുന്നു. തമിഴ്നാട്ടില്‍ നിന്ന് കോട്ടയത്തേക്ക് ജോലി തേടി പോയ മാര്‍ത്താണ്ഡം സ്വദേശികളെയാണ് പിടികൂടിയത്. ഇവരെ തിരിച്ചയച്ചെങ്കിലും ഇവരെ കടത്തിക്കൊണ്ട് പോകാനായി കോട്ടയത്ത് നിന്നെത്തിയ കാറിന്റെ ഉടമ കോട്ടയം കുടമാളൂര്‍ സ്വദേശിയായ ആന്റണി മഹേന്ദ്രന്റെ (44) പേരില്‍ പോലീസ് കേസെടുത്ത ശേഷം ജാമ്യത്തില്‍ വിട്ടയച്ചു.
