തിരുവനന്തപുരം : നിരക്ക് വര്ദ്ധിപ്പിക്കാം ചര്ച്ചയില് തീരുമാനം ആട്ടോ – ടാക്സി പണിമുടക്ക് മാറ്റി. ഓട്ടോ – ടാക്സി നിരക്ക് വര്ദ്ധിപ്പിക്കുക, സംസ്ഥാന സര്ക്കാര് ഇന്ധന നികുതി കുറയ്ക്കുക തുടങ്ങിയ ആവശ്യങ്ങളുന്നയിച്ച് ബി.എം.എസ് സംയുക്ത മോട്ടോര് ഫെഡറേഷന് തൊഴിലാളികള് ഡിസംബര് 30ന് സംസ്ഥാന വ്യാപകമായി നടത്താനിരുന്ന പണിമുടക്ക് മാറ്റി. ഗതാഗത മന്ത്രിയുമായി നടത്തിയ ചര്ച്ചയിലാണ് തീരുമാനമായത്. ആവശ്യം ന്യായമാണെന്ന് ഗതാഗത വകുപ്പ് മന്ത്രി ആന്റണി രാജു പറഞ്ഞു. യൂണിയനുകളുടെ ആവശ്യം പരിഗണിക്കുമെന്നും മന്ത്രി കൂട്ടിച്ചേത്തു.
നിരക്ക് വര്ദ്ധനവിനെക്കുറിച്ച് പഠിക്കാന് ജസ്റ്റിസ് രാമചന്ദ്രന് കമ്മിറ്റിയ്ക്ക് ചുമതല നല്കി. ഒരു മാസത്തിനുള്ളില് റിപ്പോര്ട്ട് നല്കണം. ട്രേഡ് യൂണിയനുകളുമായി ചര്ച്ച നടത്തി പരിഹാരം കാണാന് സര്ക്കാര് തയാറാകാത്ത സാഹചര്യത്തിലാണ് പണിമുടക്കുന്നതെന്ന് കേരളപ്രദേശ് ഓട്ടോറിക്ഷാ മസ്ദൂര് ഫെഡറേഷന് സംസ്ഥാന പ്രസിഡന്റ് സി.ജ്യോതിഷ്കുമാര്, കേരള ടാക്സി ആന്റ് ലൈറ്റ് മോട്ടോര് മസ്ദൂര് ഫെഡറേഷന് സംസ്ഥാന ജനറല് സെക്രട്ടറി ഗോവിന്ദ് ആര്.തമ്പി, ഓട്ടോറിക്ഷാ മസ്ദൂര് സംഘം ജനറല് സെക്രട്ടറി വി.രാജേഷ് തുടങ്ങിയവര് കഴിഞ്ഞ ദിവസം പറഞ്ഞിരുന്നു.
