കോന്നി : അരുവാപ്പുലം ഗ്രാമപഞ്ചായത്തിലെ കൊവിഡ് പ്രതിരോധ പ്രവർത്തനങ്ങളുടെ ഭാഗമായി ആവണിപ്പാറ ഗിരിജൻ കോളനിയിൽ കോവിഷീൽഡ് വാക്സിൻ വിതരണം ചെയ്തു. കോളനി നിവാസികളായ അറുപത്തിയെട്ട് പേർക്കാണ് വാക്സിൻ വിതരണം ചെയ്തത്‌.
മൊബൈൽ ഫോൺ റേഞ്ച്, ഇന്റർനെറ്റ് ലഭ്യത എന്നിവ ഇല്ലാതിരുന്നതിനാൽ ആവണിപ്പാറയിലെ ജനങ്ങൾക്ക് വാക്സിൻ സ്വീകരിക്കുന്നതിനായി ഓൺലൈൻ രജിസ്ട്രേഷന്‍ സാധ്യമല്ലായിരുന്നു. പ്രതികൂല കാലാവസ്ഥയിലും അരുവാപ്പുലം ഗ്രാമപഞ്ചായത്തിന്റെ പ്രത്യേക നിർദേശപ്രകാരമാണ് വാക്സിനേഷൻ പൂർത്തീകരിച്ചത്.
ബ്ലോക്ക് പഞ്ചായത്ത് അംഗം വർഗീസ് ബേബി, അരുവാപ്പുലം ഗ്രാമപഞ്ചായത്ത് പ്രസിഡന്റ് രേഷ്മ മറിയം റോയ്, പത്തനംതിട്ട ജില്ലാ ഓഫീസർ ഡോ ഗണേഷ്, മെഡിക്കൽ ഓഫീസർ ശ്രീജയൻ, സെക്ടറൽ മജിസ്ട്രേറ്റ് അഞ്ചു, റേഞ്ച് ഓഫീസർ അജീഷ് മധുസൂദനൻ, ജനപ്രതിനിധികളായ പി സിന്ധു, ജോജു വർഗീസ്, ആരോഗ്യ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.
