കൊച്ചി : നടിയും സംവിധായികയുമായ ലക്ഷദ്വീപ് സ്വദേശിനി ആയിഷ സുല്‍ത്താനക്കെതിരായ രാജ്യദ്രോഹക്കേസിലെ തുടര്‍ നടപടികള്‍ക്ക് ഹൈകോടതി സ്റ്റേ. രാജ്യദ്രോഹക്കുറ്റം മരവിപ്പിച്ച സുപ്രീം കോടതി വിധിയുടെ പശ്ചാത്തലത്തിലാണ് ലക്ഷദ്വീപ് അന്ത്രോത്ത് ജുഡീഷ്യല്‍ ഫസ്റ്റ് ക്ലാസ് മജിസ്ട്രേറ്റ് കോടതിയിലുള്ള കേസിലെ തുടര്‍നടപടികള്‍ ജസ്റ്റിസ് എ.എ സിയാദ് റഹ്മാന്‍ നാലുമാസത്തേക്ക് സ്റ്റേ ചെയ്ത് ഇടക്കാല ഉത്തരവ് പുറപ്പെടുവിച്ചത്.
കവരത്തി പോലീസ് രജിസ്റ്റര്‍ ചെയ്ത കേസില്‍ നേരിട്ട് ഹാജരാകാന്‍ മജിസ്ട്രേറ്റ് കോടതി നിര്‍ദേശിച്ചതിനെതിരെ ആയിഷ സുല്‍ത്താന ഫയല്‍ ചെയ്ത ഹരജിയാണ് കോടതി പരിഗണിച്ചത്. ലക്ഷദ്വീപ് അഡ്മിനിസ്‌ട്രേറ്ററുടെ ചില നടപടികള്‍ക്കെതിരായ പ്രക്ഷോഭം നടക്കുന്നതിനിടെ ഒരു ചാനല്‍ ചര്‍ച്ചയില്‍ സംബന്ധിച്ച ആയിഷ സുല്‍ത്താന ‘ബയോ വെപ്പണ്‍’ (ജൈവായുധം) എന്ന പരാമര്‍ശം നടത്തിയതിനെത്തുടര്‍ന്നാണ് രാജ്യദ്രോഹക്കുറ്റം ചുമത്തി കേസെടുത്തത്.
