കോന്നി : അരുവാപ്പുലം ഗ്രാമപഞ്ചായത്ത് പ്രസിഡന്റായി ബി രേഷ്മയെ തിരഞ്ഞെടുത്തു. ഇന്ന് രാവിലെ അരുവാപ്പുലം ഗ്രാമ പഞ്ചായത്ത് കോൺഫറൻസ് ഹാളിൽ നടന്ന യോഗത്തിലാണ് രേഷ്മ അരുവാപ്പുലം ഗ്രാമപഞ്ചായത്ത് സ്ഥാനത്തേക്ക് തിരഞ്ഞെടുക്കപ്പെട്ടത്. രാവിലെ പത്തരയോടെ ആണ് പ്രസിഡന്റ് തിരഞ്ഞെടുപ്പ് നടന്നത്. മുരുകേശൻ ആയിരുന്നു വരണാധികാരി. വൈസ് പ്രസിഡന്റായി അരുവാപ്പുലം ഗ്രാമ പഞ്ചായത്തിലെ പുളിഞ്ചാണി 12ആം വാർഡിൽ നിന്നും തിരഞ്ഞെടുക്കപ്പെട്ട ജി ശ്രീകുമാറിനെ അരുവാപ്പുലം ഗ്രാമപഞ്ചായത്ത് വൈസ് പ്രസിഡന്റ് ആയി തിരഞ്ഞെടുത്തു.
പട്ടികജാതി വനിതാ സംവരണം വന്നതോടെ ആണ് രേഷ്മ പ്രസിഡന്റ് സ്ഥാനത്തേക്ക് തിരഞ്ഞെടുക്കപ്പെട്ടത്. യു ഡി എഫ് ന് ഭൂരിപക്ഷം ലഭിച്ച വാർഡിലെ ഏക പട്ടികജാതി വനിതയും രേഷ്മയാണ്. എൽ ഡി എഫ് മൂന്ന് വാർഡുകളിൽ പട്ടികജാതി വനിതകളെ മത്സരിപ്പിച്ചിരുന്നു. എന്നാൽ യു ഡി എഫ് ഒരാളെ മാത്രമാണ് മത്സരിപ്പിച്ചിരുന്നത്. എം കോം അവസാന വർഷ വിദ്യാഥിനിയാണ് രേഷ്മ. അരുവാപ്പുലം ഗ്രാമപഞ്ചായത്തിന്റെ ചരിത്രത്തിൽ ആദ്യമായാണ് കൊക്കാത്തോട്ടിൽ നിന്ന് ഒരാൾ പ്രസിഡന്റ് സാധാനത്തേക്ക് കടന്നുവരുന്നത്. സത്യവാചകം ചൊല്ലിയതിന് ശേഷം പ്രസിഡന്റിനെയും വൈസ് പ്രസിഡന്റിനെയും ഷാൾ അണിയിച്ച് യു ഡി എഫ് നേതാക്കളും ഗ്രാമപഞ്ചായത്ത് അംഗങ്ങളും സ്വീകരിച്ചു. കോന്നി പി ഡബ്ല്യൂ ഡി അസിസ്റ്റന്റ് എഞ്ചിനിയർ രൂപക്, ഗ്രാമപഞ്ചായത്ത് ജീവനക്കാർ തുടങ്ങിയവർ പങ്കെടുത്തു.
