തിരുവനന്തപുരം : മുല്ലപ്പെരിയാറിലെ മരംമുറി ഉത്തരവ് അറിഞ്ഞില്ലെന്ന് മന്ത്രി റോഷ് അഗസ്റ്റിന്റെ ഓഫീസ്. ഉത്തരവിട്ടത് അറിഞ്ഞില്ലെന്ന് റോഷിഅഗസ്റ്റിനും അനുമതി നല്‍കിയത് ആഭ്യന്തര വകുപ്പാണെന്ന് പ്രതിപക്ഷവും. മുഖ്യമന്ത്രിയുടെ ഓഫീസും വനംവകുപ്പും ഇക്കാര്യം അറിഞ്ഞില്ലെന്ന് വനംവകുപ്പ് മന്ത്രി എ.കെ ശശീന്ദ്രന്‍ നേരത്തെ വ്യക്തമാക്കിയിരുന്നു. ഇതിനുപിന്നാലെയാണ് ജലവിഭവകുപ്പും കൈമലര്‍ത്തുന്നത്.
അതിനിടെ വിഷയത്തില്‍ രൂക്ഷവിമര്‍ശനവുമായി പ്രതിപക്ഷം രംഗത്തുവന്നു. അനുമതി നല്‍കിയത് ആഭ്യന്തരവകുപ്പെന്ന് കെ.സുധാകരന്‍. കേരളത്തിന്റെ താല്‍പര്യത്തെ ഒറ്റുകൊടുത്തുവെന്നും കെ.പി.സി.സി അധ്യക്ഷന്‍ കുറ്റപ്പെടുത്തി. അതേസമയം മരംമുറിക്കാന്‍ സര്‍ക്കാര്‍ അനുമതി നല്‍കിയത് വിചിത്രമായ കാര്യമെന്ന് വി.എം സുധീരനും വിമര്‍ശിച്ചു. സര്‍ക്കാരിന്റെ ഉത്തരവാദിത്തമില്ലായ്മയാണ് ഇത് കാണിക്കുന്നത്. ഡാമിന്റെ കാര്യത്തില്‍ ജനങ്ങളുെട ആശങ്ക അകറ്റണമെന്നും സുധീരന്‍ ആവശ്യപ്പെട്ടു.
