കാസര്കോട്: ബേക്കലില് രണ്ട് നാട്ടുകാരെ പോലീസ് അകാരണമായി കസ്റ്റഡിയിലെടുത്തെന്നാരോപിച്ച് നൂറുകണക്കിന് ആളുകള് തടിച്ചുകൂടി പ്രതിഷേധിച്ചു. ലോക്ക്ഡൗണ് നിയന്ത്രണങ്ങളെല്ലാം ലംഘിച്ച ആള്ക്കൂട്ടം രണ്ടര മണിക്കൂറോളം പോലീസ് വാഹനം തടഞ്ഞ് റോഡ് ഉപരോധിക്കുകയായിരുന്നു.
കഴിഞ്ഞദിവസം അനധികൃത മണല്ക്കടത്ത് തടഞ്ഞ നാട്ടുകാരെ മണല് മാഫിയയുടെ സഹായികളായ പോലീസുകാര് കള്ളക്കേസില് കുടുക്കിയെന്നാരോപിച്ചായിരുന്നു പ്രതിഷേധം. എന്നാല് ലോക്ക്ഡൗണ് ലംഘിച്ച് പുറത്തിറങ്ങിയതിനാല് നാട്ടുകാരെ കസ്റ്റഡിയിലെടുക്കുകയായിരുന്നുവെന്നാണ് പോലീസ് പറയുന്നത്.
ബി ജെ പി-സി പി എം നേതാക്കളും മത്സ്യത്തൊഴിലാളി നേതാക്കളും പോലീസുമായി നടത്തിയ ചര്ച്ചയെ തുടര്ന്ന് കസ്റ്റഡിയിലെടുത്ത രണ്ട് പേരെയും വിട്ടയച്ചു. തുടര്ന്ന് രാഷട്രീയ നേതാക്കളുടേയും ഡി വൈ എസ് പി ഉള്പ്പെടെ മുതിര്ന്ന പോലീസ് ഉദ്യോഗസ്ഥരുടേയും നിര്ദ്ദേശമനുസരിച്ച് ആളുകള് പിരിഞ്ഞു പോവുകയായിരുന്നു.
