ഡല്ഹി: കര്ണാടക നിയമസഭാ തെരഞ്ഞെടുപ്പിന്റെ പ്രചാരണത്തില് നിന്ന് കേന്ദ്ര ആഭ്യന്തരമന്ത്രി അമിത് ഷായെയും ഉത്തര്പ്രദേശ് മുഖ്യമന്ത്രി യോഗി ആദിത്യനാഥിനെയും വിലക്കണമെന്ന് കോണ്ഗ്രസ്. ന്യുനപക്ഷങ്ങള്ക്കെതിരെ ഇരുവരും നടത്തിയ പരാമര്ശങ്ങള് ചൂണ്ടിക്കാട്ടി നേതാക്കള് തെരഞ്ഞെടുപ്പ് കമ്മീഷനെ സമീപിച്ചു. കര്ണാടകയിലെ തെരഞ്ഞെടുപ്പ് പ്രചാരണത്തിനിടെ വോട്ട് ലക്ഷ്യമിട്ട് ഇരുവരും വ്യാജവും വര്ഗീയപരവുമായ പരാമര്ശങ്ങളാണ് നടത്തിയതെന്നും ഇതിന് അനുവദിക്കരുതെന്നും നേതാക്കള് ആവശ്യപ്പെട്ടു. അഭിഷേക് സിംഗ്വി, പവന് കുമാര് ബന്സാല്, മുകുള് വാസ്നിക് എന്നിവരുള്പ്പെടെയുള്ള കോണ്ഗ്രസ് നേതാക്കളുടെ ഒരു പ്രതിനിധി സംഘമാണ് തെരഞ്ഞെടുപ്പ് കമ്മീഷനെ സമീപിച്ചത്.
തെരഞ്ഞെടുപ്പ് റാലിയില് വിദ്വേഷ പ്രസംഗം നടത്തിയതിന് കോണ്ഗ്രസ് പോലീസില് പരാതി നല്കിയിരുന്നു. പ്രകോപനപരമായ പ്രസ്താവനകള് നടത്തുകയും ശത്രുതയും വെറുപ്പും പ്രചരിപ്പിക്കുകയും പ്രതിപക്ഷത്തെ അപകീര്ത്തിപ്പെടുത്തുകയും ചെയ്തതായി കോണ്ഗ്രസ് ബംഗളൂരു ഹൈ ഗ്രൗണ്ട് പോലീസ് സ്റ്റേഷനില് നല്കിയ പരാതിയില് പറയുന്നു. കോണ്ഗ്രസ് അധികാരത്തില് വന്നാല് പോപ്പുലര് ഫ്രണ്ട് നിരോധനം പിന്വലിക്കുമെന്നായിരുന്നു അമിത് ഷായുടെ പരാമര്ശം.
