കോട്ടയം : സൗത്ത് ഇന്ത്യന്‍ ബാങ്ക് കോഴഞ്ചേരി ശാഖയിലെ ഉദ്യോഗസ്ഥന്‍ തീപൊള്ളി മരിച്ച നിലയില്‍. കോട്ടയം മാങ്ങാനം തുരുത്തേല്‍ നരസിംഹസ്വാമി ക്ഷേത്രത്തിന് സമീപം പൈങ്ങളത്ത് വിഷ്ണു ഭാസ്‌കറിനെ (28) ആണ് തീകൊളുത്തി മരിച്ച നിലയില്‍ കണ്ടെത്തിയത്. തിങ്കളാഴ്ച രാവിലെ പത്ത് മണിയോടെയാണ് സംഭവം. വീട്ടുകാരെല്ലാം ഒരു വിവാഹത്തില്‍ പങ്കെടുക്കാന്‍ പോയ സമയത്ത് വിഷ്ണു വാടകയ്ക്കു കൊടുത്തിരിക്കുന്ന വീടിന്റെ മുറിയില്‍ കയറി ദേഹത്ത് മണ്ണെണ്ണ ഒഴിച്ചു തീ കൊളുത്തുകയായിരുന്നു.
മുറിയില്‍ നിന്നും തീയും പുകയും ഉയരുന്നത് കണ്ട് സമീപവാസികള്‍ ഓടിയെത്തി കതക് തകര്‍ത്ത് അകത്ത് എത്തിയപ്പോഴേക്കും മരണം സംഭവിച്ചിരുന്നു. അവിവാഹിതനാണ്. അപ്രതീക്ഷിതമായുണ്ടായ മരണത്തിന്റെ ആഘാതത്തില്‍ ആണ് ബന്ധുക്കളും സുഹൃത്തുക്കളും. ജോലിസംബന്ധമായ പ്രശ്‌നങ്ങളാണോ മരണത്തിനു പിന്നിലെന്നു വ്യക്തമല്ല. സംഭവത്തില്‍ കോട്ടയം ഈസ്റ്റ് പോലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.
