കോട്ടയം : കോട്ടയത്തു കാറില് കടത്തുകയായിരുന്നു 10 ചാക്ക് നിരോധിത പുകയില ഉല്പന്നങ്ങള് ജില്ലാ പോലീസ് ചീഫിന്റെ ലഹരി വിരുദ്ധ സ്ക്വാഡും ചിങ്ങവനം പോലീസും ചേര്ന്നു പിടികൂടി. പാലക്കാട് പട്ടാന്പി, വെല്ലപ്പുഴ, പുത്തന് പീടിയേക്കല് സൈനുല് ആബിദ് (24), ഒറ്റപ്പാലം കടന്പഴിപ്പുറം പാലയ്ക്കല് റിയാസ് (34) എന്നിവരാണ് അറസ്റ്റിലായത്. ഇന്നലെ രാത്രി 10നു മണിപ്പുഴ ഈരയില്ക്കടവ് ബൈപ്പാസിലായിരുന്നു ലഹരിവേട്ട. ക്രിസ്മസ് ന്യു ഇയര് ആഘോഷ കാലത്തു വന്തോതില് നിരോധിക പുകയില ഉല്പന്നങ്ങള് ജില്ലയിലേക്കു എത്തുന്നതായി രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില് ജില്ലാ പോലീസ് ചീഫ് ഡി. ശില്പ, നാര്കോട്ടിംക് സെല് ഡി.വൈ.എസ്.പി എന്നിവരുടെ നിര്ദേശാനുസരണം ലഹരി വിരുദ്ധ സ്ക്വാഡ് അംഗങ്ങള് ദിവസങ്ങളായി വിവിധ സ്ഥലങ്ങളില് വാഹന പരിശോധനയുമായി റോഡിലുണ്ടായിരുന്നു.
ഇന്നലെ പരിശോധന നടത്തുന്നതിനിടയിലാണ് ഈരയില്ക്കടവ് മണിപ്പുഴ ബൈപ്പാസ് റോഡിലുടെ എത്തിയ മാരുതി ബെലോന കാറിനു കൈകാണിച്ചു വിവരങ്ങള് തിരക്കിയത്. ഇവരുടെ സംസാരത്തില് പൊരുത്തക്കേട് തോന്നിയതോടെ പോലീസ് കാര് പരിശോധിക്കുകയായിരുന്നു. ഇതോടെ കാറിന്റെ ഡിക്കിയില് ചാക്കുകളില്കെട്ടി സൂക്ഷിച്ചിരുന്നു ആറു ലക്ഷം രൂപ വിലവരുന്ന നിരോധിത പുകയില ഉല്പന്നങ്ങള് കണ്ടെത്തിയത്. ജില്ലയിലുടെ വിവിധ ഭാഗങ്ങളിലായി വിതരണം ചെയ്യുന്നതിനു വേണ്ടിയാണ് നിരോധിത പുകയില ഉല്പന്നങ്ങള് എത്തിച്ചതെന്നു പോലീസ് പറഞ്ഞു. ഇവരെ വിശദമായി ചോദ്യം ചെയ്തുവരികയാണ്. ചിങ്ങവനം എസ്എച്ച്ഒ ടി.ആര് ജിജുവിന്റെ നേതൃത്വത്തില് എസ്ഐ ജോണ്സണ് ആന്റണി, എഎസ്ഐ രവീന്ദ്രന്, സിപിഒ ജോജി, ലഹരി വിരുദ്ധ സ്ക്വാഡ് അംഗങ്ങളായ എസ്.ഐ. സജീവ് ചന്ദ്രന്, ശ്രീജിത്ത് ബി നായര്, തോംസണ് കെ മാത്യു, അജയകുമാര്, എസ്.അരുണ്, വി.കെ അനീഷ്, പി.എം ഷിബു, ഷമീര് സമദ് എന്നിവര് ചേര്ന്നാണ് പ്രതികളെ പിടികൂടിയത്.
