കൊച്ചി : ആചാരത്തിന്റെ ഭാഗമായി ക്ഷേത്രങ്ങളില് കാലങ്ങളായി നടക്കുന്ന വെടിക്കെട്ട്, എവിടെയെങ്കിലും അപകടം ഉണ്ടായതിന്റെ പേരില് നിരോധിക്കുന്നത് അപകടം ഉണ്ടായതിന്റെ പേരില് റോഡ് ഗതാഗതവും റെയില് ഗതാഗതവുമൊക്കെ നിരോധിക്കുന്നതിന് സമമാണെന്ന് ഹൈക്കോടതി. തൃശ്ശൂര് ആറാട്ടുപുഴപൂരം, പാലക്കാട് കാവശ്ശേരിപൂരം എന്നിവയുടെ ഭാഗമായുള്ള വെടിക്കെട്ടിന് എ.ഡി.എം. അനുമതി നിഷേധിച്ചത് ചോദ്യം ചെയ്യുന്ന ഹര്ജിയില് പുറപ്പെടുവിച്ച ഉത്തരവിലാണ് ജസ്റ്റിസ് പി.വി. കുഞ്ഞികൃഷ്ണന്റെ നിരീക്ഷണം.
ആറാട്ടുപുഴ ക്ഷേത്രത്തില് ആചാരത്തിന്റെ ഭാഗമായി കാലങ്ങളായി നടക്കുന്ന വെടിക്കെട്ട് സ്ഥിരമായി തടയാനാകില്ല. അപകടം ഉണ്ടാകുന്നത് സര്ക്കാര് ആവശ്യത്തിന് മുന്കരുതല് എടുക്കാത്തതിനാലാണ്. എല്ലാ ക്ഷേത്രങ്ങളിലും വെടിക്കെട്ട് അനുവദിക്കണം എന്നല്ല പറയുന്നത്. പക്ഷെ അത് ആചാരത്തിന്റെ ഭാഗമായ ക്ഷേത്രങ്ങളില് മറ്റൊരിടത്ത് അപകടം ഉണ്ടായി എന്നതിന്റെ പേരില് വെടിക്കെട്ട് അനുവദിക്കാതിരിക്കരുതെന്നും കോടതി പറഞ്ഞു. എ.ഡി.എം.മാരുടെ ഉത്തരവുകള് റദ്ദാക്കിയ ഹൈക്കോടതി കര്ശനമായ നിബന്ധനകളോടെ വെടിക്കെട്ടിന് അനുമതി നല്കാനും നിര്ദേശിക്കുകയും ചെയ്തു.
