അഞ്ചല്: ഏരൂര് ഭാരതീപുരത്ത് മാതാവും സഹോദരനും ചേര്ന്ന് കൊലപ്പെടുത്തിയ ഷാജി പീറ്ററുടെ കേസിലെ ഒന്നാം പ്രതി സജിന് പീറ്ററുടെ ഭാര്യ ആര്യ മുന്കൂര് ജാമ്യത്തിന് കോടതിയെ സമീപിച്ചു. കൃത്യം നടക്കുമ്പോള് ഏക ദൃക്സാക്ഷിയാണെന്നും തെളിവ് നശിപ്പിക്കലിന് ഒത്താശ ചെയ്തെന്നും വിവരം രഹസ്യമാക്കിവെച്ചിരുന്നുവെന്നുമുള്ള കുറ്റങ്ങളാണ് ആര്യക്കുമേല് ആരോപിക്കപ്പെടുന്നത്.
ഭര്ത്താവും കേസിലെ ഒന്നാം പ്രതിയുമായ സജിന് പീറ്ററുമായുള്ള സംഘട്ടനത്തിലാണ് ഷാജി പീറ്റര് കൊല്ലപ്പെടുന്നത്. കമ്പിവടി കൊണ്ട് തലക്കേറ്റ രണ്ട് ക്ഷതങ്ങളാണ് മരണത്തിന് കാരണമായത്. റിമാന്ഡില് നിന്ന് കസ്റ്റഡിയില് വാങ്ങിയ മുഖ്യപ്രതിയുമായി പോലീസ് നടത്തിയ തെളിവെടുപ്പില് അടിക്കാനുപയോഗിച്ച കമ്പിവടി വീട്ടുവരാന്തയില്നിന്ന് പോലീസ് കണ്ടെടുത്തു.
രണ്ടാം പ്രതിയായ മാതാവ് പൊന്നമ്മക്ക് കോവിഡ് പോസിറ്റിവായതിനാല് കസ്റ്റഡിയില് വാങ്ങിയില്ല. ആര്യയോട് ഷാജി പീറ്റര് അപമര്യാദയായി പെരുമാറിയെന്നതിനെച്ചൊല്ലിയായിരുന്നു സംഘട്ടനമുണ്ടായത്. കൊലപാതകം നടന്ന ദിവസം ഷാജി പീറ്ററുടെ വീട്ടില് സുഹൃത്തുക്കളായ ഏതാനും പേര്കൂടി ഉണ്ടായിരുന്നതായും ബഹളത്തിനിടെ ഇവര് ഓടിപ്പോയെന്നും ചില സൂചനകള് പോലീസിന് ലഭിച്ചിട്ടുണ്ട്. ഇതേക്കുറിച്ചുള്ള അന്വേഷണവും പോലീസ് ആരംഭിച്ചിട്ടുണ്ട്. ആര്യയുടെ മുന്കൂര് ജാമ്യാപേക്ഷ കോടതി തള്ളിയാല് കേസിലെ മൂന്നാം പ്രതിയായി അറസ്റ്റ് ചെയ്യപ്പെടും.
