മലപ്പുറം: നിലമ്പൂരില് ഉള്വനത്തില് തേന് ശേഖരിയ്ക്കാന് പോയ ആദിവാസി യുവാവിന് നേരേ കരടിയുടെ ആക്രമണം. പോത്തുകല്ല് മുണ്ടേരി തരിപ്പപൊട്ടി കോളനിയിലെ വെളുത്തയെയാണ് കരടി ആക്രമിച്ചത്. ആക്രമണത്തില് വലതു കാലിന്റെ തുടയ്ക്ക് പരുക്കേറ്റു. മഞ്ചേരി മെഡിക്കല് കോളേജില് നിന്ന് പ്രാഥമിക ചികിത്സ നല്കി തിരിച്ചയച്ചു.
അതേസമയം, സമാനമായ രീതിയില് തൃശൂര് ചേലക്കര പൈങ്കുളത്ത് സ്കൂട്ടര് യാത്രികരെ കാട്ടുപന്നി തട്ടി രണ്ട് പേര്ക്ക് പരിക്ക്. സ്കൂട്ടറില് ഇടിച്ച് ജോലിക്ക് പോവുകയായിരുന്ന സഹോദരങ്ങള്ക്കാണ് കാട്ടുപന്നിയുടെ ആക്രമണമേറ്റത്. പാഞ്ഞാള് കാരപ്പറമ്പില് വീട്ടില് രാധ (33), പൈങ്കുളം കരിയാര്കോട് വീട്ടില് രാകേഷ് (30) എന്നിവര്ക്കാണ് പരിക്കേറ്റത്. ഇവരെ തൃശൂര് അശ്വനി ആശുപത്രിയില് പ്രവേശിപ്പിച്ചു.
