പത്തനംതിട്ട : പത്തനംതിട്ട നഗരത്തിലെ സൗന്ദര്യവത്കരണ നടപടികളുടെ ഭാഗമായി നടന്ന നിര്മ്മാണ പ്രവര്ത്തനങ്ങള്ക്കിടയില് വാട്ടര് അതോറിറ്റി പൈപ്പ് പൊട്ടിയപ്പോള് സംഭവം ആരെയും അറിയിക്കാതെ ജെ.സി.ബി ഒപ്പറേറ്ററും സംഘവും തടി തപ്പിയതായി പരാതി. റോഡിന്റെ വശങ്ങള് ഇന്റര്ലോക്ക് കട്ടകള് പാകുവാന് ആഴത്തില് കുഴി എടുത്തപ്പോള് ജെ.സി.ബിയുടെ കൈ തട്ടി പൈപ്പ് ഇളകി മുകളിലേക്ക് വരികയും പൊട്ടി ശക്തമായി വെള്ളം പുറത്തേക്ക് ചാടുകയുമായിരുന്നു.
സംഭവം നാട്ടുകാരുടെ ശ്രദ്ധയില്പ്പെടുകയും ദൃശ്യങ്ങള് മൊബൈല് ഫോണില് പകര്ത്താന് ശ്രമിക്കുകയും ചെയ്തതോടെ ഇവര് ഇവിടെ നിന്നും കടന്നു കളഞ്ഞുവെന്ന് യാത്രക്കാര് പറഞ്ഞു. പത്തനംതിട്ട നഗരത്തിലെ വിവിധ പ്രദേശങ്ങളില് കുടിവെള്ള പൈപ്പ് ലൈന് തകരാറില് ആയതിനെ തുടര്ന്ന് ആഴ്ചകളായി വെള്ളം ലഭിക്കാതെ ഇരിക്കുമ്പോഴാണ് അലക്ഷ്യമായുള്ള ഈ നിര്മ്മാണ പ്രവര്ത്തനങ്ങള്. കഴിഞ്ഞ കുറച്ചു ദിവസങ്ങളായി ഇവിടെ നിര്മ്മാണ പ്രവര്ത്തനങ്ങള് നടന്നു വരികയായിരുന്നു. ഇതിന്റെ ഭാഗമായി കഴിഞ്ഞ ദിവസം ഇവിടുത്തെ കച്ചവട സ്ഥാപനങ്ങളും ഒഴിപ്പിച്ചിരുന്നു.
