ബെംഗളൂരു; ബെംഗളൂരു-മൈസൂര് എക്സ്പ്രസ് വേ വെള്ളക്കെട്ട് പ്രശ്നം പരിഹരിച്ചെന്ന് കേന്ദ്രം. കഴിഞ്ഞയാഴ്ച പെയ്ത മഴയില് വന് ഗതാഗതക്കുരുക്ക് റിപ്പോര്ട്ട് ചെയ്തതിന് പിന്നാലെയാണ് കേന്ദ്രത്തിന്റെ നടപടി. തകരാര് പരിഹരിച്ച് മഴവെള്ളം സുഗമമായി ഒഴുകുന്നതിനായി പൈപ്പുകള് സ്ഥാപിച്ചതായി അധികൃതര് പറഞ്ഞു.
വെള്ളപ്പൊക്ക പ്രശ്നം പരിഹരിച്ചതായി തെളിയിക്കുന്ന എക്സ്പ്രസ് വേയുടെ ചിത്രങ്ങളും വിഡിയോകളും കേന്ദ്രം പുറത്തുവിട്ടു.
മഴയില് വെള്ളത്തിനടിയിലായതിനാല് നിര്മാണ നിലവാരത്തെച്ചൊല്ലി വിവാദത്തിലായിരുന്നു. ബെംഗളൂരു-മൈസൂരു എക്സ്പ്രസ്വേയില് മദാപുര ഗ്രാമത്തിന് സമീപമുള്ള സംഗബസവന്തോഡിയില് വെള്ളക്കെട്ട് പ്രശ്നം പരിഹരിച്ചതായി തിങ്കളാഴ്ച നാഷണല് ഹൈവേ അതോറിറ്റി ഓഫ് ഇന്ത്യ വിശദീകരണം നല്കി. ഈ ഭാഗത്ത് ഗതാഗതം സുഗമമായി നടക്കുന്നതായും അധികൃതര് അറിയിച്ചു. യാത്രക്കാരുടെ സുരക്ഷ ഉറപ്പാക്കാന് ചെയിന് ലിങ്ക് ഫെന്സിങ് കര്ശനമായി പരിപാലിക്കണമെന്ന് എന്എച്ച്എഐ അധികൃതര് പ്രോജക്ട് ഡയറക്ടറോടും കരാറുകാരനോടും നിര്ദേശിച്ചു.
