ബെംഗളൂരു: നവരാത്രി, ദീപാവലി ഉത്സവകാലത്തോടനുബന്ധിച്ച്‌ ബെംഗളൂരുവില്‍ നിന്ന് കേരളത്തിലേക്ക് അനുവദിച്ച പ്രത്യേക ട്രെയിനുകള്‍ക്ക് കേരളം അനുമതി നല്‍കാതിരുന്നതോടെ റദ്ദാക്കി. ഒക്ടോബര്‍ 20 മുതല്‍ നവംബര്‍ 30 വരെ യശ്വന്ത്പുര-കണ്ണൂര്‍, കന്യാകുമാരി-ബെംഗളൂരു (ഐലന്‍ഡ് എക്സ്പ്രസ്) ട്രെയിനുകളാണ് റെയില്‍വെ ഇറക്കിയ ആദ്യ പട്ടികയിലുണ്ടായിരുന്നത്.
ട്രെയിന്‍ സര്‍വ്വീസിന് കേരള സര്‍ക്കാര്‍ അനുമതി നല്‍കാതിരുന്നതോടെ അന്തിമ പട്ടികയില്‍ ബെംഗളൂരുവില്‍ നിന്നുള്ള രണ്ടു ട്രെയിനുകളും ഉള്‍പ്പെട്ടിട്ടില്ല. കൊറോണ കാലഘട്ടമായതിനാല്‍ അതാതു സംസ്ഥാനങ്ങളുടെ അനുമതിയില്ലാതെ സര്‍വ്വീസിന് സാധിക്കില്ലെന്നാണ് റെയില്‍വെ ഉദ്യോഗസ്ഥരുടെ വിശദീകരണം.
കേരളത്തിലേക്കുള്ള സര്‍വ്വീസിന് റെയില്‍വെ എല്ലാ തയ്യാറെടുപ്പുകളും നടത്തിയിരുന്നെങ്കിലും കേരള സര്‍ക്കാരിന്റെ നിലപാട് വിലങ്ങുതടിയായി. ഓണത്തിനുള്‍പ്പെടെ പ്രത്യേക ട്രെയിന്‍ സര്‍വ്വീസ് ആവശ്യം ബെംഗളൂരു മലയാളികള്‍ മുന്നോട്ടുവെച്ചിരുന്നെങ്കിലും കേരളം അനുമതി നല്‍കിയിരുന്നില്ല.
