കൊച്ചി : ബെവ് ക്യൂ ആപ് തയ്യാറാക്കാനും പ്രവര്‍ത്തിപ്പിക്കാനും ഫെയര്‍കോഡ് ടെക്നോളജീസിന് കരാര്‍ നല്‍കിയത് റദ്ദാക്കണമെന്നാവശ്യപ്പെട്ട് ഹൈക്കോടതിയില്‍ ഹര്‍ജി. കൊച്ചിയിലെ സ്റ്റാര്‍ട്ടപ്പ് കമ്പനിയായ ടീബസ് മാര്‍ക്കറ്റിംഗ് പ്രൈവറ്റ് ലിമിറ്റഡാണ് ഹൈക്കോടതിയില്‍ ഹര്‍ജി നല്‍കിയിരിക്കുന്നത്. ഹര്‍ജി തീര്‍പ്പാകുന്നതു വരെ കരാര്‍ സ്റ്റേ ചെയ്യണമെന്ന് ഇടക്കാല ആവശ്യമായി ഉന്നയിച്ചിട്ടുണ്ട്.
കേസില്‍ തീര്‍പ്പുകല്‍പ്പിക്കും വരെ ഫെയര്‍ക്കോഡിന്റെ സേവനം തടയണമെന്നും പുതിയ ആപ് വികസിപ്പിക്കുന്നതിന് ദാദാക്കളെ തെരഞ്ഞെടുക്കണമെന്നും ആവശ്യപ്പെട്ടു. ഫെയര്‍ കോഡ് സ്റ്റാര്‍ട്ട്‌അപ്പ് കമ്പനിയല്ല. വിവര സാങ്കേതിക വകുപ്പിന്റെ മാനദണ്ഡങ്ങള്‍ പാലിച്ചല്ല കമ്പനിയെ തെരഞ്ഞെടുത്തത്. ആവശ്യകതകള്‍ വിശദീകരിച്ച്‌ വിജ്ഞാപനം ഇറക്കാതെ തിരക്കിട്ടാണ് കമ്പനിയെ തെരഞ്ഞെടുത്തത്. തെരഞ്ഞെടുപ്പ് നടപടി ക്രമത്തിന്റെ ഭാഗമായുള്ള അഭിമുഖവും സാങ്കേതിക പരിശോധനയും പ്രഹസനമായിരുന്നെന്നും ഹര്‍ജിക്കാര്‍ ആരോപിക്കുന്നു. കേരള സ്റ്റാര്‍ട്ടപ്പ് മിഷനിലെ യോഗ്യതയില്ലാത്ത കരാര്‍ ജീവനക്കാരനാണ് സാങ്കേതിക പരിശോധന നടത്തിയതെന്നും ഹര്‍ജിയില്‍ ചൂണ്ടികാണിക്കുന്നു. തെരഞ്ഞെടുപ്പ് നടപടികളുടെ രേഖകള്‍ വിളിച്ചു വരുത്തണമെന്നും സൂം ദൃശ്യങ്ങള്‍ നശിപ്പിക്കരുതെന്ന് നിര്‍ദേശം നല്‍കണമെന്നും ഹര്‍ജിയില്‍ ആവശ്യമുണ്ട്.
