പീരുമേട്: തട്ടാത്തിക്കാനം പൈൻ കാടിന് സമീപമുള്ള ഉണ്ണിക്കയം അപകടകാരിയാകുന്നു. കഴിഞ്ഞ ഒരു മാസത്തിനുള്ളിൽ രണ്ട് ജീവനുകൾ ഇവിടെ പൊലിഞ്ഞിട്ടുണ്ട്. പ്രകൃതി സൗന്ദര്യം കൊണ്ട് എറെ ആകർഷകമാണീ പ്രദേശം. അഴുതയാറിൻ്റെ ഉത്ഭവ പ്രദേശമായ ഇവിടെ സ്വാഭാവിക നീന്തൽകുളം രൂപപ്പെട്ടിട്ടുണ്ട്. എന്നാൽ ശാന്തമെന്ന് തോന്നുന്ന ഈ കയത്തിൽ ചെളിയും പാറയുടെ അള്ളും ഉണ്ട്. കൂടാതെ വെള്ളത്തിന് കടുത്ത തണുപ്പുമാണ്. പാറയിൽ പായൽ പിടിച്ചിരിക്കുന്നത് തെന്നിവീഴാൻ ഇടയാകും.
തട്ടാത്തിക്കാനം പൈൻ കാടുകളിൽ നിന്ന് ഒന്നര കിലോമീറ്റർ കാൽ നടയായി സഞ്ചരിച്ചുവേണം ഇവിടെ എത്താൻ. ഇരുവശവും കുറ്റികാട് മൂടി കിടക്കുന്ന ഒറ്റയടി പാത താണ്ടി ധാരാളം വിനോദ സഞ്ചാരികൾ ഇവിടെ എത്തുന്നു. പ്രദേശത്ത് എത്തുന്നവരിൽ ഒരു വിഭാഗം ലഹരി ഉപഭോക്താക്കളാണെന്ന് പ്രദേശവാസികൾ പറയുന്നു. അധികാരികളുടെ ശക്തമായ നിരീക്ഷണം ഇല്ലെങ്കിൽ കുറ്റകൃത്യങ്ങളുടെ കേന്ദ്രമായി ഈ പ്രദേശം മാറുമെന്ന് ആശങ്കയുണ്ട്.
