മഹാരാഷ്ട്ര: രാഹുൽ ഗാന്ധിയുടെ നേതൃത്വത്തിലുള്ള ‘ഭാരത് ജോഡോ യാത്ര’ പുരോഗമിക്കുകയാണ്. നവംബർ 23 ന് മധ്യപ്രദേശിന്റെ ഹൃദയഭൂമിയിൽ പ്രവേശിക്കാൻ ഒരുങ്ങുകയാണ്. മഹാരാഷ്ട്രയിലാണ് പര്യടനം ഇപ്പോൾ എത്തി നിൽക്കുന്നത്. കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയും മധ്യപ്രദേശിൽ ഭാരത് ജോഡോ യാത്രയുടെ ഭാഗമാകും. മുതിർന്ന പാർട്ടി നേതാവ് ജയറാം രമേശാണ് ഇക്കാര്യം അറിയിച്ചത്.
ഇതാദ്യമായാണ് പ്രിയങ്ക ഗാന്ധി ഭാരത് ജോഡോ യാത്രയിൽ പങ്കെടുക്കുന്നത്. നേരത്തെ കോൺഗ്രസ് മുൻ അധ്യക്ഷ സോണിയ ഗാന്ധി കർണാടകയിലെ യാത്രയിൽ പങ്കെടുത്തിരുന്നു. ബുർഹാൻപൂരിന് സമീപം മധ്യപ്രദേശിൽ പ്രവേശിക്കുന്ന യാത്ര ബുധനാഴ്ച പുനരാരംഭിക്കുമെന്ന് മുതിർന്ന കോൺഗ്രസ് നേതാവ് ജയറാം രമേശ് ട്വിറ്ററിൽ കുറിച്ചു. നാല് ദിവസം പ്രിയങ്ക ഗാന്ധി യാത്രയിൽ പങ്കെടുക്കും.