കാഞ്ഞിരപ്പള്ളി: പേട്ടക്കവലയില് ബൈക്ക് ബസിനടിയില്പെട്ട് ഉണ്ടായ അപകടത്തില് യുവാവ് മരിച്ചു. കാഞ്ഞിരപ്പള്ളി പാറക്കടവില് വാടകയ്ക്ക് താമസിക്കുന്ന ആനിത്തോട്ടം ഒതളശേരിയില് ആന്റണി വര്ഗീസിന്റെ മകന് ഡേവിസ് ആന്റണി (30) ആണ് മരിച്ചത്.
ലോറിയെ മറികടക്കാനുള്ള ശ്രമത്തിനിടെ ബൈക്കില് സഞ്ചരിക്കുകയായിരുന്ന ഡേവിസ് ബസിനടിയില് പെടുകയായിരുന്നു എന്ന് ദൃക്സാക്ഷികള് പറഞ്ഞു. ഓടിക്കൂടിയ ആള്ക്കൂട്ടം കാഴ്ചക്കാരായപ്പോള് സംഭവമറിഞ്ഞെത്തിയ പോലീസാണ് ബസിനടിയില് നിന്ന് യുവാവിനെ വലിച്ചു പുറത്തെടുത്തതും ആശുപത്രിയില് എത്തിച്ചതും. ഗുരുതരമായി പരിക്കേറ്റ യുവാവിനെ ആദ്യം കാഞ്ഞിരപ്പള്ളി ജനറല് ആശുപത്രിയില് പ്രവേശിപ്പിച്ചു. ഇവിടെ നിന്ന് കോട്ടയം മെഡിക്കല് കോളേജിലേക്ക് കൊണ്ടുപോകവേ മരണം സംഭവിക്കുകയായിരുന്നു.