കൊല്ലം: കൊല്ലത്ത് ബൈക്ക് നിയന്ത്രണം വിട്ട് ബാരിക്കേഡിലിടിച്ചുണ്ടായ അപകടത്തിൽ 20കാരനായ യുവാവ് മരിച്ചു. രണ്ട് സുഹൃത്തുക്കൾക്ക് ഗുരുതര പരിക്കേറ്റു. കല്ലമ്പലം ചേന്നൻകോടിന് സമീപം മധുരക്കോട് തിരുവാതിരയിൽ ബാബു-അജിത ദമ്പതികളുടെ ഏകമകനായ അക്കുടു എന്ന് വിളിക്കുന്ന അരുൺ കൃഷ്ണ (20) ആണ് മരിച്ചത്. അപകടത്തിൽ ബൈക്കിലുണ്ടായിരുന്ന സുഹൃത്തുക്കളായ മാവിൻമൂട് സ്വദേശി ശ്യാം, നെല്ലിക്കോട് സ്വദേശി ബാലു എന്നിവർക്ക് ഗുരുതരമായി പരിക്കേറ്റു. ഇരുവരെയും സമീപത്തെ ആശുപത്രിയിൽ പ്രവേശിപ്പിച്ചിരിക്കുകയാണ്.
നാവായിക്കുളം 28 മൈൽ മങ്ങാട്ടുവാതുക്കൽ പെട്രോൾ പമ്പിന് സമീപം ഇന്ന് പുലർച്ചെ ഒരുമണിയോടെയായിരുന്നു അപകടം. അരുൺ കൃഷ്ണ സംഭവസ്ഥലത്തു വച്ചുതന്നെ മരിച്ചു. മൂവരും ആറ്റിങ്ങൽ ഭാഗത്തുനിന്നും കൊല്ലം ഭാഗത്തേക്ക് ബൈക്കിൽ വരികയായിരുന്നു. റോഡിൽ സ്ഥാപിച്ചിരുന്ന വലിയ ഇരുമ്പ് ബാരിക്കേഡിലേക്ക് ബൈക്ക് നിയന്ത്രണം വിട്ട് ഇടിച്ചുകയറിയാണ് അപകടം സംഭവിച്ചത്.
