തിരുവനന്തപുരം : കഴക്കൂട്ടത്ത് നാലംഗ ബൈക്ക് മോഷണ സംഘം പിടിയില്. വെഞ്ഞാറമൂട് സ്വദേശി മഞ്ജീഷ് (27), അഴൂര് ശാസ്തവട്ടം സ്വദേശികളായ ഹരിപ്രസാദ് (20), സൂരജ് (20), കണിയാപുരം സ്വദേശി ബിലാല് (22) എന്നിവരാണ് കഴക്കൂട്ടം പോലീസിന്റെ പിടിയിലായത്. മോഷ്ടിക്കുന്ന ബൈക്കുകള് നമ്പര് പ്ലേറ്റ് മാറ്റി കുറച്ചു ദിവസം ഉപയോഗിച്ച ശേഷം പൊളിച്ചു വിളിക്കുന്നതാണ് സംഘത്തിന്റെ രീതിയെന്ന് പോലീസ് പറഞ്ഞു. കഴിഞ്ഞ ദിവസം പോലീസ് പരിശോധനക്കിടെ മൂന്നുപേര് സഞ്ചരിച്ച ബൈക്ക് കൈ കാണിച്ചിട്ടും നിറുത്താതെ പോയിരുന്നു.
തുടര്ന്ന് പോലീസ് ഇവരെ പിന്തുടര്ന്ന് പിടികൂടുകയായിരുന്നു. ഇവര് സഞ്ചരിച്ച ബൈക്ക് കോവളത്ത് നിന്നും മോഷ്ടിച്ചതായിരുന്നു. തുടര്ന്ന് ഇവരെ ചോദ്യം ചെയ്തതില് നിന്നാണ് തുമ്പ സ്റ്റേഷന് പരിധിയില് നിന്ന് രണ്ടു ബൈക്കുകള് പൊളിച്ചു വിറ്റതായി അറിഞ്ഞത്. ജില്ലയിലെ വിവിധ സ്റ്റേഷനുകളില് അടിപിടി വധശ്രമക്കേസുകളില് പ്രതികളാണിവര്. ആറ്റിങ്ങല് കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
