തിരുവനന്തപുരം : സാമ്പത്തിക ഇടപാട് കേസില് ബെംഗളൂരിവില് ഇഡി ചോദ്യം ചെയ്യുന്ന വിനീഷ് കോടിയേരിയുടെ കുടുംബത്തെ തിരുവനന്തപുരത്തെ വീട്ടില് തടഞ്ഞുവെച്ച് എന്ഫോഴ്സ്മെന്റ് ഡയറക്ടറേറ്റ് ഉദ്യോഗസ്ഥര്. ഇന്നലെ രാവിലെ 9 മണിയോടെ ബിനീഷില് നിന്നും ലഭിച്ച വിവരങ്ങള് സ്ഥിരീകരിക്കാന് എന്ന ആവശ്യവുമായി വീട്ടില് പരിശോധനയ്ക്കെത്തിയ സംഘം 20 മണിക്കൂറിലേറെയായി വീട്ടില് തുടരുന്നു.
പരിശോധനകള് ഇന്നലെ മൂന്ന് മണിയോടുകൂടെ തന്നെ പൂര്ത്തിയായെങ്കിലും കുടുംബം വീട്ടില് നിന്നും പോയില്ലെന്ന് മാത്രമല്ല ബിനീഷിന്റെ ഭാര്യയും മകളും അമ്മയും അച്ഛനും ഉള്പ്പെടെയുള്ള കുടുംബത്തെ പുറത്തുള്ളവരുമായി ബന്ധപ്പെടുന്നതിനും അനുമതി നിഷേധിച്ചിരിക്കുകയാണ്. ബിനീഷിന്റെ അഭിഭാഷകന് കുടുംബത്തെ കാണാന് അനുമതി തേടിയിരുന്നെങ്കിലും കാണാന് അനുവദിച്ചില്ല ശേഷം ഫോണിലൂടെയാണ് അഭിഭാഷകന് കുടുംബത്തെ ബന്ധപ്പെടാന് സാധിച്ചത്.
മൂന്ന് മണിക്ക് പരിശോധന പൂര്ത്തിയായ ശേഷം ഇഡി ഉദ്യോഗസ്ഥര് ചില രേഖകളില് നിര്ബന്ധിച്ച് ഒപ്പിടാന് ബിനീഷിന്റെ ഭാര്യയോട് ആവശ്യപ്പെടുകയായിരുന്നു. എന്നാല് ബിനീഷിന്റെ ഭാര്യ ഇത് സമ്മതിച്ചില്ല ഇതിനെ തുടര്ന്നാണ് ഇഡി കുടുംബത്തെ തടങ്കലിലാക്കിയത്.
