തിരുവനന്തപുരം : ബിനീഷ് കോടിയേരി നല്ല ചെറുക്കനാണെന്ന് പി സി ജോർജ്. ബിനീഷിനെ തനിക്ക് വ്യക്തിപരമായി അറിയാമെന്നും കുഴിയിൽ വീണ പന്നിക്ക് കല്ലും തടിയെന്ന പോലെയാണ് ബിനീഷിനെ താറടിക്കുന്നതെന്നും പി സി ജോർജ് പറഞ്ഞു. ബിനീഷ് കോടിയേരിയും ഷോൺ ജോർജും നീനു മോഹൻദാസും ചേർന്ന് എറണാകുളം ഹൈക്കോടതിയിൽ പ്രാക്ടീസ് തുടങ്ങുന്നതിന്റെ ഭാഗമായി ആരംഭിച്ച ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു പി സി ജോർജ്.
ബിനീഷിനെ പറ്റി ആരൊക്കെ എന്തൊക്കെ പറഞ്ഞാലും എനിക്ക് അറിയാവുന്നത്ര ആർക്കും അറിയില്ല. കണ്ണൂരുകാരുടെ രക്തത്തിന് ഇത്തിരി ചൂട് കൂടുതലാണ്. അതിന്റേതായ കുഴപ്പത്തിനപ്പുറം കൂടുതലൊന്നുമില്ല. പഠിക്കുന്ന കാലം മുതലേ അങ്ങനെയാ. എകെ ആന്റണി മുഖ്യമന്ത്രിയായിരുന്ന കാലത്ത് ഇവരെ അറസ്റ്റ് ചെയ്യാൻ നിന്നത്. അന്ന് ഇവന്റെ അമ്മ കരഞ്ഞു. കോടിയേരി മിണ്ടാതിരുന്നു. മടുത്തപ്പോൾ ഞാൻ ഈരാറ്റുപേട്ട കൊണ്ടുപോയി മൂന്നുമാസം എന്റൊപ്പം താമസിപ്പിച്ചു. നല്ല പയ്യനാ. കഞ്ഞി വെക്കാൻ വരെ ഉഷക്ക് കൂട്ടായിരുന്നു. പാവം ചെറുക്കനാ. നല്ലചെറുപ്പക്കാരനെ കുറിച്ച് നെഗറ്റീവ് ഇമേജ് ഉണ്ടാക്കരുത്.
അവൻ പണം ഉണ്ടാക്കാൻ പോയി. കുറ്റം പറയാൻ പറ്റുമോ. ഒരു വർഷം കർണ്ണാടകയിൽ ജയിലിൽ കിടന്നിട്ട് എന്തെങ്കിലും തെളിയിക്കാൻ കഴിഞ്ഞോ. ഷോൺ രണ്ട് വർഷമായി പാലാ കോടതിയിൽ പ്രാക്ടീസ് ചെയ്യുന്നുണ്ട്. ഞാൻ ഉദ്ഘാടനം ചെയ്ത് അരമണിക്കൂർ കൊണ്ടുതന്നെ നാല് കേസ് കിട്ടിയിട്ടുണ്ട്. പിള്ളേരുടെ തൊഴിൽ നടക്കും. പിള്ളേരെക്കെ നന്നായി വരട്ടെ.
