ചെറുകോല്പ്പുഴ: ഹിന്ദു ദേവീദേവൻമാരെ അധിക്ഷേപിക്കുന്ന ഓമല്ലൂരിലെ ബിനു പാസ്റ്ററെ അറസ്റ്റ് ചെയ്യണമെന്ന് അയിരൂർ ചെറുകോൽപ്പുഴ ഹിന്ദുമത മഹാമണ്ഡലം പ്രമേയത്തിലൂടെ ആവശ്യപ്പെട്ടു. വാർഷിക പൊതുയോഗത്തിൽ പി.എൻ രഘുത്തമൻ നായർ അവതരിപ്പിച്ച പ്രമേയത്തിലാണ് ആവശ്യമുന്നയിച്ചത്. അനധികൃതമായി പ്രവർത്തിക്കുന്ന ഓമല്ലൂർ ഏലോഹിം പ്രാർത്ഥനാലയം അടച്ചു പൂട്ടണമെന്നും പാസ്റ്റർ ബിനുവിനെ അറസ്റ്റ് ചെയ്യണമെന്നും മഹാമണ്ഡലം വൈസ് പ്രസിഡന്റ് അഡ്വ. കെ.ഹരിദാസ് ആവശ്യപ്പെട്ടു. സേവനത്തിന്റെ മറവിൽ നടത്തുന്ന പാസ്റ്റർ ബിനുവിന്റെ അനധികൃത സ്വത്തുസമ്പാദനവും അന്വേഷിക്കണം.
ഓമല്ലൂർ കേന്ദ്രീകരിച്ച് സമാധാന അന്തരീക്ഷം തകർത്തും മതസൗഹാർദ്ദത്തിന് വെല്ലുവിളിയുയർത്തിയും നടത്തുന്ന പ്രാർത്ഥനാലയത്തിനെതിരെ നാട്ടുകാർ നിരവധി പരാതികളാണ് പഞ്ചായത്തിൽ നൽകിട്ടുള്ളത്. എന്നാൽ പഞ്ചായത്ത് ഭരണസമിതിയെയും പ്രസിഡന്റിനേയും മറ്റ് നിയമസംവിധാനങ്ങളെയും വെല്ലുവിളിച്ചുകൊണ്ടാണ് അനധികൃത പ്രാർത്ഥനാലയം പ്രവർത്തിക്കുന്നത്. അതിനാൽ ഇ.ഡി അന്വേഷണം ആവശ്യമാണ്. ഇക്കാര്യത്തിൽ കേന്ദ്ര സംസ്ഥാന സർക്കാരുകൾ ഇടപെടണമെന്നും പ്രമേയം ആവശ്യപ്പെടുന്നു.
