തിരുവനന്തപുരം: ബിപോര്ജോയ് ചുഴലിക്കാറ്റ് അതിതീവ്ര ചുഴലിക്കാറ്റായി ശക്തി പ്രാപിച്ചെന്ന് കേന്ദ്ര കാലാവസ്ഥാ വകുപ്പ്. മധ്യ-കിഴക്കന് അറബിക്കടലിന് മുകളിലുള്ള ബിപോര്ജോയ് തീവ്രചുഴലിക്കാറ്റ് അതി-തീവ്രചുഴലിക്കാറ്റായി ശക്തി പ്രാപിച്ചിരിക്കുകയാണ്. വടക്ക് ദിശയില് സഞ്ചരിക്കുന്ന ബിപോര്ജോയ് മധ്യ-കിഴക്കന് അറബിക്കടലിനു മുകളില് അടുത്ത 24 മണിക്കൂറില് വടക്ക് ദിശയിലേയ്ക്കും തുടര്ന്നുള്ള 3 ദിവസം വടക്ക് – വടക്ക് പടിഞ്ഞാറ് ദിശയിലേയ്ക്കും സഞ്ചരിക്കാന് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
കേരളത്തില് അടുത്ത 5 ദിവസം വ്യാപകമായി ഇടി / മിന്നല് / കാറ്റോട് കൂടിയ മഴക്ക് സാധ്യതയുണ്ട്. ജൂണ് 7 മുതല് 11 വരെ ഒറ്റപ്പെട്ട സ്ഥലങ്ങളില് ശക്തമായ മഴക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. കാലാവസ്ഥയില് ഇതേ തുടര്ന്നുണ്ടായ മാറ്റത്തോടെ കേരളത്തില് മഴ കൂടുതല് മേഖലയിലേക്ക് വ്യാപിക്കുന്നുണ്ട്. തിരുവനന്തപുരം, കൊല്ലം, റാന്നി, ആലപ്പുഴ, കോട്ടയം, എറണാകുളം, തൃശ്ശൂര്, കോഴിക്കോട്, കണ്ണൂര് ജില്ലയുടെ വടക്ക് കിഴക്കന് മേഖലയിലുമാണ് മഴ ഇപ്പോള് വ്യാപിച്ചിരിക്കുന്നത്.
