തിരുവനന്തപുരം: അമ്പൂരിയില് രാഖി എന്ന യുവതി കൊല്ലപ്പെട്ട കേസില് മൂന്ന് പ്രതികളും കുറ്റക്കാരെന്ന് തിരുവനന്തപുരം ആറാം അഡീഷണല് സെഷന് ജഡ്ജ് കെ.വിഷ്ണു കണ്ടെത്തി. അമ്പൂരി തട്ടാമുക്ക് അശ്വതി ഭവനില് അഖില് (24), അഖിലിന്റെ സഹോദരന് രാഹുല് (27), ഇവരുടെ സുഹൃത്ത് അമ്പൂരി തട്ടാന്മുക്ക് ആദര്ശ് നായര് (23) എന്നിവരെയാണ് കൊലപാതകം, തെളിവ് നശിപ്പിക്കല് എന്നീ കുറ്റങ്ങളില് കുറ്റക്കാരെന്ന് കണ്ടെത്തിയത്. 2019 ജൂണിലാണ് കേസിനാസ്പദമായ സംഭവം നടന്നത്.
പൂവാര് സ്വദേശിനി രാഖിയുടെ മൃതദേഹം തട്ടാംപുരം സ്വദേശി അഖിലിന്റെ വീട്ടുവളപ്പില് കുഴിച്ചിട്ട നിലയില് കണ്ടെത്തിയത്. രാഖിയുടെ മൃതദേഹം മൂന്നു പേരും ചേര്ന്നു അഖിലിന്റെ തട്ടാമൂക്കിലെ പുതിയതായി പണിത വീടിന്റെ പുറകു വശത്ത് നേരത്തെ തയ്യാറാക്കി വച്ചിരുന്ന കുഴിയില് മറവുചെയ്തു. മൃതശരീരം നഗ്നയാക്കി ഉപ്പു പരലുകള് വിതറി മണ്ണിട്ട് മൂടി തുടര്ന്ന് കമുക് തൈകള് വെച്ച് പിടിപ്പിക്കുകയും ചെയ്തു. തുടര്ന്ന് അഖില് ജോലിസ്ഥലമായ ലഡാക്കിലും ആദര്ശും രാഹുലും ഗുരുവായൂരിലേക്കും സ്ഥലം വിടുകയും ചെയ്തു. മകളെ കാണാനില്ലെന്ന് കാണിച്ച് രാഖിയുടെ പിതാവ് രാജന് പുവ്വാര് പോലീസില് നല്കിയ പരാതിയിലാണ് പ്രതികള് പിടിയിലായത്.
