തിരുവനന്തപുരം : ബി.ജെ.പി സംസ്ഥാന അധ്യക്ഷൻ കെ. സുരേന്ദ്രന്റെ പദയാത്രയിൽ കേന്ദ്ര സർക്കാറിനെതിരെ പാട്ട് വന്നതിൽ വിചിത്ര വിശദീകരണവുമായി ബി.ജെ.പി ഐ.ടി സെൽ. വാഹനത്തിലെ ജനറേറ്റർ പണിമുടക്കിയത് കാരണം ലൈവ് ടീമിന്റെ നെറ്റ് വർക്കിൽ പ്രശ്നമുണ്ടായി. ആ സമയം യുട്യൂബിൽ പാട്ടുകളിട്ടപ്പോൾ വന്ന വീഴ്ചയാണെന്നാണ് വിശദീകരണം. 40 സെക്കന്റ്‌ കഴിഞ്ഞപ്പോഴേക്കും അബദ്ധം മനസ്സിലായെന്നും വിശദീകരണത്തിൽ വ്യക്തമാക്കുന്നു.
കെ. സുരേന്ദ്രനാണ് ഐ.ടി സെൽ വിശദീകരണം നൽകിയിരിക്കുന്നത്. പദയാത്ര മലപ്പുറം ജില്ലയിലെ പൊന്നാനി ലോക്സഭ മണ്ഡലത്തിലെത്തിയപ്പോഴാണ് അബദ്ധം സംഭവിച്ചത്. ‘അഴിമതിക്ക് പേര് കേട്ട കേന്ദ്രഭരണ തന്ത്രം’ എന്നാണ് വീഡിയോയിൽ പറയുന്നത്. അതേസമയം, കെ. സുന്ദ്രേനുമായി ബി.ജെ.പി ഐ.ടി സെൽ ഉടക്കിലാണെന്നും മനഃപൂർവം ചെയ്തതാണെന്നുമുള്ള റിപ്പോർട്ടുകൾ വന്നിരുന്നു. ഇതിന്റെ പശ്ചാത്തലത്തിലാണ് ഐ.ടി സെൽ മറുപടി നൽകിയിരിക്കുന്നത്. ഗാനവുമായി ബന്ധപ്പെട്ട് പദയാത്ര അവലോകന യോഗത്തിൽ രൂക്ഷ വിമർശനം ഉയർന്നിരുന്നു.
