നോയിഡ : യുവതിയെ അപമാനിച്ച ബിജെപി കിസാന്മോര്ച്ച നേതാവിനെതിരെ നടപടി. ഒളിവില് കഴിയുന്ന ശ്രീകാന്ത് ത്യാഗിയുടെ കെട്ടിടം അധികൃതര് പൊളിച്ച് നീക്കി. അനധികൃത നിര്മാണമെന്ന് ചൂണ്ടിക്കാട്ടിയാണ് സെക്ടര്-93 ബിയിലുള്ള ഗ്രാന്ഡ് ഒമാക്സ് സൊസൈറ്റിയിലെ ഫ്ലാറ്റ് ജില്ലാ ഭരണകൂടം ബുള്ഡോസര് കൊണ്ട് പൊളിച്ചത്. ഇന്ന് രാവിലെയാണ് ബുള്ഡോസര് നടപടി ആരംഭിച്ചത്. പോലീസുമായി എത്തിയ അധികൃതര് ശ്രീകാന്ത് ത്യാഗിയുടെ അനധികൃത കെട്ടിടം പൊളിച്ച് നീക്കുകയായിരുന്നു. കോമണ് ഏരിയയിലും പാര്ക്കിംഗിലും നടത്തിയ നിര്മാണം പൂര്ണമായി നീക്കി. ഹൗസിംഗ് സൊസൈറ്റിയില് ബഹളം സൃഷ്ടിച്ച ത്യാഗിയുടെ അനുയായികളെയും കസ്റ്റഡിയിലെടുത്തു. സ്ത്രീയോട് അപമര്യാദയായി പെരുമാറിയ കേസിലെ മുഖ്യപ്രതി ശ്രീകാന്ത് ത്യാഗി ഒളിവിലാണ്.
കഴിഞ്ഞ ദിവസമാണ് ത്യാഗിയും ഹൗസിംഗ് സൊസൈറ്റിയില് താമസക്കാരിയായ വനിതയും തമ്മില് വൃക്ഷത്തൈകള് നടുന്നതുമായി ബന്ധപ്പെട്ട് തര്ക്കം നടന്നത്. ത്യാഗി സ്ത്രീയെ അസഭ്യം പറയുകയും ആക്രമിക്കുകയും ചെയ്യുന്നതിന്റെ വീഡിയോ സോഷ്യല് മീഡിയയിലൂടെ പുറത്ത് വരുകയും ചെയ്തു. പ്രതികള്ക്കായി പോലീസ് തെരച്ചില് നടത്തുകയാണ്. ബിജെപി നേതാവിനെ കണ്ടെത്തുന്നവര്ക്ക് ഗൗതം ബുദ്ധ നഗര് പോലീസ് 25,000 രൂപ പാരിതോഷികം പ്രഖ്യാപിച്ചിട്ടുണ്ട്.
