പത്തനംതിട്ട : സിപിഐഎം സംസ്ഥാന സമ്മേളനത്തിന് പിന്നാലെ പരസ്യമായി അതൃപ്തി പ്രകടിപ്പിച്ച മുതിര്ന്ന നേതാവ് എ പത്മകുമാറിന്റെ വീട്ടിലെത്തി സന്ദര്ശനം നടത്തി ബിജെപി നേതാക്കള്. ബിജെപി ജില്ലാ പ്രസിഡന്റ് വിഎ സൂരജ്, ജനറല് സെക്രട്ടറി അയിരൂര് പ്രദീപ് എന്നിവരാണ് സംസ്ഥാന നേതൃത്വത്തിന്റെ നിർദ്ദേശപ്രകാരം പത്മകുമാറിന്റെ വീട്ടില് എത്തിസന്ദർശനം നടത്തിയത്. ബിജെപിയുടെ ചില മുതിര്ന്ന സംസ്ഥാന നേതാക്കള് പത്മകുമാറുമായി ഫോണില് സംസാരിച്ചതായും റിപ്പോര്ട്ടുകളുണ്ട്. 15 മിനിറ്റ് നേരമാണ് ബിജെപി നേതാക്കള് പത്മകുമാറിന്റെ വീട്ടില് ചെലഴിച്ചത്. ബി.ജെ.പി യിലെത്തിയാല് സ്വീകരിക്കാന് തയ്യാറാണെന്ന സംസ്ഥാനനേതൃത്വത്തിന്റെ അഭിപ്രായം അറിയിച്ചുവെന്നാണ് ബി.ജെ.പി വൃത്തങ്ങള് അനൗദ്യോഗികമായി അറിയിക്കുന്നത്. എന്നാല് കൂടിക്കാഴ്ചയുമായി ബന്ധപ്പെട്ട് പ്രതികരിക്കാന് നേതാക്കള് തയ്യാറായിട്ടില്ല.
സിപിഐഎം സംസ്ഥാന സമതിയിയിലേക്ക് പരിഗണിക്കാത്തതില് എ പത്മകുമാര് കഴിഞ്ഞ ദിവസം പരസ്യമായി അതൃപ്തി പ്രകടിപ്പിപ്പിച്ചിരുന്നു. തന്നെക്കാള് ജൂനിയറായ വീണാ ജോര്ജിനെ സംസ്ഥാന സമിതി ക്ഷണിതാവാക്കിയതാണ് പത്മകുമാറിനെ പ്രകോപിപ്പിച്ചത്.
