എഴുമറ്റൂർ : ഗ്രാമീണ മേഖലയിലെ തൊഴിലാളികളുടെ അവകാശ സംരക്ഷണത്തിനും ക്ഷേമത്തിനും വേണ്ടിയുള്ള പോരാട്ടങ്ങൾ കൂടുതൽ ശക്തമാക്കണമെന്ന് ബി.കെ.എം.യു ജില്ലാ സെക്രട്ടറി കെ.ജി രതീഷ് കുമാര് പറഞ്ഞു. ബി.കെ.എം.യു എഴുമറ്റൂർ മണ്ഡലം കൺവെൻഷന് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തൊഴിലുറപ്പ് തൊഴിലാളികളുടെ കൂലി സമയബന്ധിതമായി വിതരണം ചെയ്യണമെന്നും കേന്ദ്ര സർക്കാർ തൊഴിലുറപ്പ് പദ്ധതിക്കുള്ള വിഹിതം വെട്ടിക്കുറയ്ക്കുന്ന നടപടിയിൽ നിന്ന് പിന്മാറണമെന്നും അദ്ദേഹം ആവശ്യപ്പെട്ടു. സമ്പദ്വ്യവസ്ഥയുടെ നട്ടെല്ലായ തൊഴിലുറപ്പ് പദ്ധതിയെ തകർക്കുന്ന നയങ്ങൾക്കെതിരെ വരും ദിവസങ്ങളിൽ ശക്തമായ പ്രക്ഷോഭ പരിപാടികൾ സംഘടിപ്പിക്കുമെന്ന് കെ.ജി രതീഷ് കുമാര് പറഞ്ഞു.
പി.പി സോമന് അധ്യക്ഷത വഹിച്ചു. സി.പി.ഐ ജില്ലാ ട്രഷറര് കെ.സതീശ്, എഴുമറ്റൂര് മണ്ഡലം സെക്രട്ടറി അനീഷ് ചുങ്കപ്പാറ, പ്രകാശ് പി.സാം, ടി.എം ബിനു, പി.എസ് ജോർജ്ജ്, നവാസ് ഖാൻ, തോമസ് കെ.തോമസ്, ഉഷാ ശ്രീകുമാർ, എം.വി ബിജു, കെ.കെ ശ്രീനിവാസൻ, ജെയിംസ് ജോൺ, ഷിബു ലൂക്കോസ് അനിൽ കേഴപ്ലാക്കൽ, ജോമോൻ സി.കെ., ശരത് കെ.കെ എന്നിവര് പ്രസംഗിച്ചു. പുതിയ ഭാരവാഹികളായി വില്സണ് സാമുവേല് (പ്രസിഡന്റ്), രമേശന് നായര് (വൈസ് പ്രസിഡന്റ്), കെ.ആര് കരുണാകരന് (സെക്രട്ടറി), ഫ്രാന്സിലി വര്ഗീസ് (ജോയിന്റ് സെക്രട്ടറി) എന്നിവരെ തെരഞ്ഞെടുത്തു.
