ന്യൂഡല്‍ഹി: രാജ്യത്ത് ബ്ലാക്ക് ഫംഗസ് (മ്യൂകോര്‍മൈകോസിസ്) അണുബാധകളുടെ എണ്ണം മൂന്നക്കം കടന്നു കുതിക്കുകയാണെന്ന് ഡല്‍ഹി ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡികല്‍ സയന്‍സസ് (എയിംസ്) ന്യൂറോളജി വിഭാഗം മേധാവി പ്രൊഫ. എം.വി.പത്മ ശ്രീവാസ്തവ പറഞ്ഞു. ബ്ലാക്ക് ഫംഗസ് കേസുകളില്‍ അതിവേഗം വര്‍ധനയുണ്ടാകുന്നതായി പത്മ ശ്രീവാസ്തവ പറഞ്ഞു.
കോവിഡ് ചികിത്സയില്‍ സ്റ്റിറോയ്ഡുകള്‍ ഉപയോഗിക്കുന്നതുമൂലം പ്രതിരോധശേഷി കുറയുന്നതിനാല്‍ ബ്ലാക്ക് ഫംഗസ് പിടിപെടാനുള്ള സാധ്യത വളരെ കൂടുതലാണ്. പ്രമേഹമുള്ള കോവിഡ് രോഗികള്‍ കൂടുതല്‍ ശ്രദ്ധിക്കണമെന്നും ശ്രീവാസ്തവ മുന്നറിയിപ്പ് നല്‍കി.
ബ്ലാക്ക് ഫംഗസ് കേസുകളുടെ എണ്ണം അതിവേഗം വര്‍ധിക്കുകയാണ്. ദിവസവും ഇരുപതിലധികം കേസുകള്‍ റിപ്പോര്‍ട്ട് ചെയ്യുന്നുണ്ട്. മേയ് 7 മുതല്‍ ഇതുവരെ ഡല്‍ഹിയിലെ സര്‍ ഗംഗാറാം ആശുപത്രിയില്‍ നൂറോളം ബ്ലാക്ക് ഫംഗസ് കേസുകള്‍ റിപ്പോര്‍ട്ട് ചെയ്തു. നിലവില്‍ 69 രോഗികള്‍ മ്യൂകോര്‍മൈകോസിസ് ബാധിച്ച്‌ ആശുപത്രിയിലുണ്ട്. എയിംസ് ട്രോമ സെന്ററിലും എയിംസ് ഝജ്ജറിലും പ്രത്യേകം മ്യൂകോര്‍ വാര്‍ഡുകള്‍ സജ്ജീകരിച്ചതായി പത്മ ശ്രീവാസ്തവ വ്യക്തമാക്കി.
