റാന്നി : ആരാധനാലയങ്ങൾ കേന്ദ്രീകരിച്ച് വഞ്ചികളും ഓട്ടുപാത്രങ്ങളും മോഷ്ടിക്കുന്ന പ്രതിയെ പോലീസ് പിടികൂടി. പെരുനാട് സ്വദേശി സുരേഷാണ് റാന്നി പോലീസിന്റെ പിടിയിലായത്. മോതിരവയൽ 5245 ആം നമ്പർ എസ്.എൻ.ഡി.പി ശാഖാ യോഗത്തിന്റെ കീഴിലുള്ള പുലിയള്ള് ഗുരുമന്ദിരത്തിലാണ് മോഷണം നടന്നത്. ഗുരുമന്ദിരത്തിന്റെ മുൻവശത്തെ ഗ്ലാസ് ഡോർ തൂമ്പ ഉപയോഗിച്ച് തല്ലി തകർത്തതിന് ശേഷമാണ് പ്രതി മോഷണം നടത്തിയത്.
ഗ്ലാസ് ഡോര് തകര്ത്ത് അകത്തുകടന്ന സുരേഷ് ഇവിടെയുണ്ടായിരുന്ന വഴിപാട് വഞ്ചി മോഷ്ടിച്ച് കടന്നുകളയുകയായിരുന്നു. സംഭവത്തിൽ പരാതി ലഭിച്ചതിനെ തുടർന്ന് റാന്നി പോലീസ് നടത്തിയ അന്വേഷണത്തിലാണ് പ്രതിയെ പിടികൂടിയത്. പോലീസ് നടത്തിയ സി.സി.ടി.വി കേന്ദ്രീകരിച്ചുള്ള അന്വേഷണമാണ് പ്രതിയെ പിടികൂടാന് സഹായിച്ചത്. ഈ മേഖലയിൽ മുൻപും സമാന രീതിയിൽ ആരാധനാലയങ്ങളിൽ മോഷണം നടന്നിട്ടുണ്ടോ എന്നും പ്രതിക്ക് മറ്റാരുടെയെങ്കിലും സഹായം ലഭിച്ചിട്ടുണ്ടോ എന്നും അന്വേഷിച്ചു വരികയാണെന്ന് റാന്നി പോലീസ് അറിയിച്ചു.
