കണ്ണൂര് : തോട്ടടയില് കല്യാണ പാര്ട്ടിക്കിടെ സ്ഫോടനത്തില് ഒരാള് കൊല്ലപ്പെട്ട സംഭവത്തില് ബോംബുണ്ടാക്കിയ ആളുള്പ്പെടെ നാലുപേര് പോലീസ് പിടിയില്. സി.കെ റുജുല്, സനീഷ്, പി.അക്ഷയ്, ജിജില് എന്നിവരെ പോലീസ് കസ്റ്റഡിയില് എടുത്തു. ബോംബ് എറിഞ്ഞ മിഥുനായി തിരച്ചില് തുടരുന്നു. കൊല്ലപ്പെട്ട ജിഷ്ണുവിനും അക്ഷയ്ക്കും മിഥുനും ബോംബിന്റെ കാര്യം അറിയാമായിരുന്നു. ഏറുപടക്കം വാങ്ങി സ്ഫോടകവസ്തുക്കള് ചേര്ത്താണ് നാടന് ബോംബുണ്ടാക്കിയത്. പ്രതികളുടെ അറസ്റ്റ് ഉടന് രേഖപ്പെടുത്തുമെന്നും അന്വേഷണ സംഘം അറിയിച്ചു.
മരിച്ച ജിഷ്ണു ബോംബുമായി എത്തിയ സംഘത്തില്പ്പെട്ട ആളാണ് എന്ന് പോലീസ് പറയുന്നു. ഇയാളുടെ പോസ്റ്റ് മോര്ട്ടം ഇന്ന് നടക്കും. കല്യാണത്തലേന്ന് വരന്റെ വീട്ടില് ഏച്ചൂരില് നിന്നെത്തിയ സംഘവും തോട്ടടയിലെ യുവാക്കളും തമ്മില് വാക്കേറ്റവും കയ്യാങ്കളിയും ഉണ്ടായിരുന്നു. രാത്രി വൈകി നടന്ന സംഗീതപരിപാടിക്കിടെയായിരുന്നു സംഘര്ഷം. കല്യാണദിവസം ഉച്ചയ്ക്ക് പ്രതികാരം വീട്ടാന് ഏച്ചൂര് സംഘം ബോംബുമായി എത്തുകയായിരുന്നു.
