ദില്ലി: ബ്രഹ്മപുരം തീപിടുത്തത്തില് സര്ക്കാരിനെ വിമര്ശിച്ച് ദേശീയ ഹരിത ട്രൈബ്യൂണല്. 500 കോടി പിഴ ഈടാക്കുമെന്നാണ് ദേശീയ ഹരിത ട്രൈബ്യൂണലിന്റെ മുന്നിറിയിപ്പ് നല്കിയിട്ടുണ്ട്. സംസ്ഥാനത്തെ ഭരണനിര്വഹണത്തിലെ വീഴ്ച്ചയെന്നും കോടതി വിമര്ശിച്ചു. ജസ്റ്റിസ് എ കെ ഗോയല് അധ്യക്ഷനായ ബെഞ്ചിന്റേതാണ് വിമര്ശനം. ദേശീയ ഹരിത ട്രൈബ്യൂണല് സ്വമേധയാ എടുത്ത കേസിലാണ് വിമര്ശനം. ആറാം തിയതിയിലെ മാധ്യമ വാര്ത്തകളുടെ അടിസ്ഥാനത്തിലാണ് ദേശീയ ഹരിത ട്രൈബ്യൂണല് സ്വമേധയാ കേസെടുത്തത്.
അതേസമയം ബ്രഹ്മപുരത്ത് തീ പൂര്ണമായി അണച്ച് രണ്ട് ദിവസങ്ങള്ക്ക് ശേഷവും തീയും പുകയും ഉയരാത്ത സാഹചര്യം ആശ്വാസകരമാണ്. വേനല് മഴ പെയ്തതും അനുകൂല സാഹചര്യത്തിലാണ്. കൊച്ചിയില് അമ്ലമഴയെന്ന പ്രചാരണത്തിനിടെ ആദ്യ വേനല് മഴയിലെ വെള്ളത്തിന്റെ സാംപിള് ശേഖരിക്കുന്നതില് മലിനീകരണ നിയന്ത്രണ ബോര്ഡിന് വീഴ്ച പറ്റി എന്നും വിമര്ശം ഉയരുന്നുണ്ട്. പ്രോട്ടോകോള് പ്രകാരം സാമ്പിള് ശേഖരിക്കേണ്ടതില്ലെന്നാണ് മലിനീകരണ നിയന്ത്രണ ബോര്ഡിന്റെ ന്യായം.
