തിരുവനന്തപുരം: ബ്രഹ്മപുരം തീപിടിത്തത്തെ തുടര്ന്നുണ്ടായ ആരോഗ്യ പ്രശ്നങ്ങളെക്കുറിച്ച് പഠിക്കുന്നതിന് വിദഗ്ധ സമിതി രൂപീകരിച്ച് ഉത്തരവ് പുറപ്പെടുവിച്ചതായി ആരോഗ്യ വകുപ്പ് മന്ത്രി വീണാ ജോര്ജ്. രണ്ട് മാസത്തിനുള്ളില് റിപ്പോര്ട്ട് നല്കും. ആരോഗ്യവകുപ്പ് ഡയറക്ടര് ഡോ. കെ ജെ റീന ആണ് വിദഗ്ധ സമിതിയുടെ കണ്വീനര്. അതേസമയം ബ്രഹ്മപുരം തീപിടിത്തത്തില് അട്ടിമറിയില്ലെന്നാണ് പോലീസ് അന്വേഷണ റിപ്പോര്ട്ട്.
ഇപ്പോഴുണ്ടായ ആരോഗ്യ പ്രശ്നങ്ങള്, അതില് ദീര്ഘകാലത്തേക്ക് നിലനില്ക്കുന്നവ, ഉണ്ടാകാനിടയുള്ള ആരോഗ്യ പ്രശ്നങ്ങള്, അവ സൃഷ്ടിക്കുന്ന ഘടകങ്ങള്, വെള്ളത്തിലോ മണ്ണിലോ മനുഷ്യ ശരീരത്തിലോ ഭക്ഷ്യ ശൃംഖലയിലോ ഉണ്ടോയെന്നും ഉണ്ടാകാനിടയുണ്ടോയെന്നും സമിതി പരിശോധിക്കും. ടേംസ് ഓഫ് റഫറന്സ് പ്രകാരമുള്ള സമഗ്രമായ റിപ്പോര്ട്ട് രണ്ട് മാസത്തിനകം വിദഗ്ധ സമിതി സര്ക്കാരിന് സമര്പ്പിക്കാന് നിര്ദേശം നല്കിയതായും മന്ത്രി വ്യക്തമാക്കി.
