തിരുവനന്തപുരം: സംസ്ഥാനത്ത് വിവിധ ജില്ലകളില് കനത്ത മഴയിലും കാറ്റിലും വന് നാശനഷ്ടം. കൊല്ലം, പത്തനംതിട്ട ജില്ലകളിലാണ് മഴയും കാറ്റും വീശിയടിച്ചത്. ശക്തമായ കാറ്റില് മരം വീണ് രണ്ട് പേര് മരിച്ചു. കൊട്ടാരക്കരയിലും ആയൂരിലും കനത്ത മഴയിലും കാറ്റിലും വ്യാപക നാശനഷ്ടങ്ങളുണ്ടായി. കനത്ത മഴയില് പൊലിക്കോട് പെട്രോള് പമ്പിന്റെ മേല്ക്കുര തകര്ന്നു. പോലീസ് സ്റ്റേഷനില് നിര്ത്തിയിട്ടിരുന്ന കാറുകള്ക്ക് മുകളില് മരം വീണതുള്പ്പെടെ നിരവധി സംഭവങ്ങളാണ് ചൊവ്വാഴ്ച റിപ്പോര്ട്ട് ചെയ്തത്. കൊട്ടാരക്കര പ്രസ് സെന്ററിന്റെ മേല്ക്കൂരയും മഴയില് തകര്ന്നു. ആയൂരില് കശുവണ്ടി ഫാക്ടറിയുടെ മേല്കൂര പറന്ന് സമീപത്തെ വീട്ടില് പതിക്കുകയും ചെയ്തു.
അടൂര് ചൂരക്കോട് സ്കൂട്ടറിന് മുകളില് മരം വീണ് ഒരു യുവാവും കൊട്ടാരക്കര ഇഞ്ചക്കാട് ശക്തമായ കാറ്റില് റബ്ബര് മരം വീണ് വൃദ്ധയുമാണ് മരിച്ചത്. അടൂരിന് സമീപമാണ് യുവാവിന്റെ ദേഹത്ത് മരം വീണത്. നെല്ലിമുകള് സ്വദേശി മനു മോഹന് ആണ് മരിച്ചത്. 32 വയസായിരുന്നു. അടൂരില് പലയിടത്തും ശക്തമായി വീശിയ കാറ്റില് വൈദ്യുതി പോസ്റ്റുകളും മരങ്ങളും ഒടിഞ്ഞുവീണു. കൊല്ലം കൊട്ടാരക്കര ഇഞ്ചക്കാട് ശക്തമായ കാറ്റില് റബ്ബര് മരം വീണാണ് വൃദ്ധ മരിച്ചത്. ഇഞ്ചക്കാട് സ്വദേശി ലളിതകുമാരി (62) ആണ് മരിച്ചത്.
