ബെംഗളൂരു : ബെംഗളൂരു ആർടി നഗർ പ്രദേശത്തെ വസതിയിൽ 21 കാരിയായ ബ്രസീലിയൻ മോഡലിനോട് ലൈംഗികാതിക്രമം നടത്തിയ ഡെലിവറി ബോയ് അറസ്റ്റിൽ. ഒക്ടോബർ 17 ന് യുവതിയുടെ അപ്പാർട്ട്മെന്റിൽ വച്ചായിരുന്നു സംഭവം. പ്രതി കുമാർ റാവു പവാറിനെ അറസ്റ്റ് ചെയ്തതായി ബെംഗളൂരു നോർത്ത് ഡിവിഷൻ ഡപ്യൂട്ടി പോലീസ് കമ്മിഷണർ (ഡിസിപി) ബാബാസാബ് നെമഗൗഡ് പറഞ്ഞു. മറ്റ് രണ്ട് യുവതികൾക്കൊപ്പം ആയിരുന്നു മോഡലിന്റെ താമസം. ബെംഗളൂരുവിലെ ഒരു സ്വകാര്യ കോളേജിലെ ഡിപ്ലോമ വിദ്യാർഥിയാണ് അറസ്റ്റിലായ കുമാർ റാവു പവാർ. പഠനത്തിനൊപ്പം പ്രമുഖ ഭക്ഷണ വിതരണ ശൃംഖലയുടെ പാർട്ട് ടൈം ഡെലിവറി ഏജന്റായി ജോലി ചെയ്യുകയായിരുന്നു ഇയാൾ. സംഭവ ദിവസം, യുവതി ഉച്ചകഴിഞ്ഞ് 3.20 ഓടെ ഭക്ഷണം ഓർഡർ ചെയ്തിരുന്നു. ഓർഡർ ഡെലിവറി ചെയ്യുന്നതിനിടെ പ്രതി മോശമായി പെരുമാറുകയും ലൈംഗിക ഉദ്ദേശ്യത്തോടെ സ്പർശിക്കുകയും ചെയ്തുവെന്നാണ് കേസ്.
