റാന്നി : ഗണിത വിജയം വീട്ടിലും വിദ്യാലയത്തിലും പരിപാടിയുടെ റാന്നി ബി.ആര്‍.സി തല ഉദ്ഘാടനം നടന്നു. മഹാമാരിക്കാലത്ത് പരസ്പരം ഒത്തു ചേർന്ന് കളികളിലൂടെയും പ്രായോഗിക പ്രവർത്തനങ്ങളിലൂടെയും ഗണിതാശയങ്ങൾ സ്വായത്തമാക്കാൻ പഠിതാക്കൾക്ക് പ്രയാസം നേരിട്ട സാഹചര്യത്തിലാണ് ഇത്തരം പരിപാടി. ഗണിതത്തിൽ ലയിച്ചുചേർന്ന് സന്തോഷകരമായ ചുറ്റുപാടിൽ വിദ്യാലയത്തിലും വീട്ടിലും ഒരുപോലെ ഗണിത പ്രവർത്തനങ്ങളിൽ ഏർപ്പെടാൻ കുട്ടികൾക്ക് പ്രചോദനം നൽകും വിധമാണ് ഗണിത വിജയം 3, 4 ക്ലാസ്സുകളിൽ നടപ്പാക്കുന്നത്. പരിപാടിയിൽ റാന്നി, പഴവങ്ങാടി, അങ്ങാടി, വെച്ചൂച്ചിറ, നാരങ്ങാനം, പെരുനാട് പഞ്ചായത്തുകളിലെ അധ്യാപകര്‍ പരിശീലനത്തിൽ പങ്കെടുത്തു.
ഗണിതപഠനം ആഹ്ലാദകരമായ അനുഭവമാക്കി മാറ്റുന്നതിന് സമഗ്ര ശിക്ഷ കേരളം നടപ്പിലാക്കിവരുന്ന പഠന പരിപോഷണ പരിപാടികളാണ് ഉല്ലാസഗണിതം, ഗണിതവിജയം, ഗണിതോത്സവം തുടങ്ങിയവ. ആസ്വാദ്യകരമായ രീതിയിൽ കുട്ടികൾക്ക് ഗണിതം അവതരിപ്പിക്കുക എന്ന മുഖ്യ ലക്ഷ്യത്തോടെയാണ് പദ്ധതി നടപ്പിലാക്കി വരുന്നത്. പരിപാടിയുടെ ബി ആർ സി തല ഉദ്ഘാടനം റാന്നി പെരുനാട് പഞ്ചായത്ത് പ്രസിഡന്റ് പി.എസ് മോഹനൻ റാന്നി ബിആർസി യിൽ നിർവഹിച്ചു. പഴവങ്ങാടി പഞ്ചായത്ത് പ്രസിഡന്റ് അനിത അനിൽകുമാർ അധ്യക്ഷത വഹിച്ചു. റാന്നി ബി ആർ സി ബ്ലോക്ക് പ്രോജക്ട് കോ – ഓർഡിനേറ്റർ ഷാജി എ സലാം, സി ആർ സി കോഡിനേറ്റർ ദീപ കെ പത്മനാഭൻ എന്നിവര്‍ പ്രസംഗിച്ചു.
