കോട്ടയം : കരാറുകാരനില് നിന്ന് കൈക്കൂലി വാങ്ങുന്നതിനിടെ ചെറുകിട ജലസേചന വിഭാഗം അസിസ്റ്റന്റ് എക്സിക്യൂട്ടീവ് എന്ജിനീയറെ വിജിലന്സ് പിടികൂടി. ചങ്ങനാശേരി പെരുന്ന കുറുപ്പന്പറമ്പില് ബിനു ജോസിനെ (55) ആണ് വിജിലന്സ് അറസ്റ്റ് ചെയ്തത്. മിനി സിവില് സ്റ്റേഷനിലെ ചെറുകിട ജലസേചന വിഭാഗം ഓഫിസില് കരാറുകാരനില്നിന്നു 10,000 രൂപ വാങ്ങി കംപ്യൂട്ടര് കീബോര്ഡിന്റെ അടിയിലേക്കു വച്ചതിനു പിന്നാലെ വിജിലന്സ് സംഘം ബിനുവിനെ പിടികൂടുകയായിരുന്നു.
2 വര്ഷം മുന്പ് 45 ലക്ഷം രൂപയുടെ ലിഫ്റ്റ് ഇറിഗേഷന് ജോലികള് പരാതിക്കാരന് കരാര് അടിസ്ഥാനത്തില് ചെയ്തിരുന്നു. ഇതിന്റെ ബില്ലുകള് മാറുന്നതിന് അസിസ്റ്റന്റ് എക്സിക്യൂട്ടീവ് എന്ജിനീയര് നിരന്തരം കൈക്കൂലി ആവശ്യപ്പെട്ടെന്നാണു പരാതി. പല തവണ 10,000 രൂപ വീതം നല്കിയെങ്കിലും പിന്നെയും കൈക്കൂലി വാങ്ങുന്നതിനു വേണ്ടി 2 വര്ഷമായി ബില്ലുകള് പൂര്ണമായി നല്കാതെ ബോധപൂര്വം വൈകിപിച്ചതായി പരാതിയിലുണ്ട്. കിട്ടാനുള്ള തുകയുടെ 4 ശതമാനത്തോളം കൈക്കൂലിയായി ഇവര് വാങ്ങിട്ടുണ്ട്.
കരാര് എടുക്കുമ്പോള് സെക്യൂരിറ്റി തുകയായി അടച്ച 2.25 ലക്ഷം രൂപ പണിപൂര്ത്തിയായപ്പോള് തിരികെ കിട്ടാനായി ഓഫിസില് എത്തിയപ്പോഴും ഇവര് 10,000 രൂപ കൈക്കൂലിയായി ആവശ്യപ്പെട്ടു. ഇതോടെയാണ് പരാതിക്കാരന് വിജിലന്സിനെ ബന്ധപ്പെടാന് തീരുമാനിച്ചത്. വിജിലന്സ് സംഘം നല്കിയ ഫിനോഫ്തലിന് പുരട്ടിയ 10,000 രൂപയുമായിട്ടാണ് ഇന്നലെ കരാറുകാരന് ഓഫിസില് എത്തിയത്. വേഷം മാറി ഓഫിസ് ആവശ്യത്തിന് എത്തിയവര് എന്ന നിലയില് വിജിലന്സ് ഉദ്യോഗസ്ഥരും ഓഫിസിനുള്ളില് പ്രവേശിച്ചിരുന്നു. കരാറുകാരന് കൈക്കൂലി കൈമാറിയതിനു പിന്നാലെ ഉദ്യോഗസ്ഥര് എന്ജിനീയറെ കൈയോടെ പിടികൂടി.
