കോഴിക്കോട്: കോഴിക്കോട് കൈക്കൂലി വാങ്ങുന്നതിനിടെ താലൂക്ക് സര്വേയറെ വിജിലന്സ് പിടികൂടി. താമരശേരി താലൂക്ക് സര്വേയര് നസീറിനെ താലൂക്ക് ഓഫീസില് വച്ചാണ് വിജിലന്സ് സംഘം പിടികൂടിയത്. അതിനിടെ വിജിലന്സിന് ഒരു അബദ്ധവും പിണഞ്ഞു. കൈക്കൂലിക്കാരന് എന്ന് കരുതി തഹസില്ദാരെയാണ് വിജിലന്സ് ആദ്യം പിടികൂടിയത്. തഹസില്ദാരും കൈക്കൂലി വാങ്ങിയ സര്വേയറും ഒരേ കളറിലുള്ള ഷര്ട്ട് ധരിച്ചതാണ് ആശയക്കുഴപ്പം ഉണ്ടാക്കിയതെന്ന് വിജിലന്സ് വിശദീകരിച്ചു.
തഹസില്ദാരുടെ യാത്രയയപ്പ് ചടങ്ങിനിടെയായിരുന്നു സംഭവം. സ്ഥലവും റോഡും സര്വേ നടത്താനായി കൂടരഞ്ഞി സ്വദേശിയില് നിന്ന് പതിനായിരം രൂപ കൈക്കൂലി വാങ്ങിയ ശേഷം തഹസില്ദാരുടെ യാത്രയയപ്പ് ചടങ്ങിനായി താലൂക്ക് ഓഫീസില് എത്തിയപ്പോഴാണ് വിജിലന്സ് നസീറിനെ പിടികൂടിയത്. കൈക്കൂലിക്കാരന് എന്ന് കരുതി തഹസില്ദാരെയാണ് വിജിലന്സ് ആദ്യം പിടികൂടിയതെങ്കിലും അബദ്ധം മനസിലായതോടെ തിരുത്തി.