പള്ളിക്കൽ : റോഡിന് വീതിയുണ്ടെങ്കിലും പാലത്തിന് വേണ്ടത്ര വീതിയില്ല. ഇതുകാരണം പാലത്തിൽ അപകടം പതിവാകുന്നു. ആനയടി-കൂടൽ റോഡിൽ മേക്കുന്നുമുകൾ ജംഗ്ഷന് സമീപത്തെ പാറ്റാണിക്കൽ പാലമാണ് വീതിക്കുറവുകാരണം വാഹനയാത്രികർ പ്രയാസത്തിലായിരിക്കുന്നത്. പൊതുവേ നല്ല വീതിയിലാണ് ആനയടി-കൂടൽ റോഡുള്ളത്. ഇതുകാരണം ചെറുതും വലുതുമായ വാഹനങ്ങൾ നല്ല വേഗത്തിലാണ് പോകുന്നത്. ആനയടി ഭാഗത്തുനിന്നുവരുമ്പോൾ പാലത്തിലേക്ക് ഇറങ്ങുന്ന ഭാഗത്ത് നല്ല ഇറക്കമാണ്. ഈ സമയം എതിർഭാഗത്തുനിന്നും വാഹനങ്ങൾ എത്തിയാൽ ആനയടി ഭാഗത്തുനിന്നും വേഗത്തിൽ എത്തുന്ന വാഹനങ്ങൾ നിയന്ത്രണംവിടാൻ സാധ്യതയേറെയാണ്.
കഴിഞ്ഞദിവസം ഇതേ പാലത്തിൽ വാനിടിച്ച് ഒരു കാൽനടയാത്രക്കാരി മരിച്ചിരുന്നു. ആനയടി ഭാഗത്തുനിന്നും പഴകുളത്തേക്ക് വരുകയായിരുന്ന തമിഴ്നാട് രജിസ്ട്രേഷൻ പിക്കപ്പ് നിയന്ത്രണംവിട്ട് ആദ്യം പാലത്തിന്റെ തൂണിൽ ഇടിച്ചു. തുടർന്ന് മുമ്പോട്ടുനീങ്ങിയ പിക്കപ്പ് നടന്നുപോകുകയായിരുന്ന രാധാമണി അമ്മയെ ഇടിക്കുകയായിരുന്നു. പള്ളിക്കൽ കള്ളപ്പൻചിറ ഭാഗത്തേക്ക് ബസ് സർവീസ് ഇല്ലാത്തതിനാൽ ഈ പാലം കടന്ന് ആളുകൾ നടന്നാണുപോകുന്നത്. പാലം അടിയന്തരമായി വീതികൂട്ടി പുനർനിർമിക്കണമെന്ന് പൊതുപ്രവർത്തകനായ ശ്രീരാജ് ഈരിക്കൽ ആവശ്യപ്പെട്ടു.
