ലണ്ടന്‍ :പള്ളിയില്‍ വോട്ടര്‍മാരുമായി കൂടിക്കാഴ്ച നടത്തവെ ബ്രിട്ടീഷ് പാര്‍ലമെന്റ് അംഗം കുത്തേറ്റ് മരിച്ചു. അക്രമിയെ അറസ്റ്റ് ചെയ്തു. കിഴക്കന്‍ ഇംഗ്ലണ്ടിലെ എസ്സെക്സിലെ സൗത്ത് ഹെന്‍ഡ് വെസ്റ്റില്‍നിന്നുള്ള പാര്‍ലമെന്റ് അംഗമായ ഡേവിഡ് അമേസ് (69) ആണ് മരിച്ചത്. വെള്ളിയാഴ്ച ഉച്ചക്ക് ഒന്നിന് ലീ-ഓണ്‍-സീയിലെ ബെല്‍ഫെയര്‍സ് മെത്തഡിസ്റ്റ് പള്ളിയിലാണ് സംഭവം. പ്രധാനമന്ത്രി ബോറിസ് ജോണ്‍സന്റെ കണ്‍സര്‍വേറ്റീവ് പാര്‍ട്ടി അംഗമാണ് ഇദ്ദേഹം.
സംഭവത്തില്‍ 25കാരനെ അറസ്റ്റ് ചെയ്തതായും ഇയാളുടെ പിന്നില്‍ മറ്റാരുമില്ലെന്നും പോലീസ് അറിയിച്ചു. കുത്താനുപയോഗിച്ച കത്തിയും കണ്ടെടുത്തു. നിരവധി തവണ ഡേവിഡിന് കുത്തേറ്റതായി ദൃക്സാക്ഷികള്‍ അറിയിച്ചു. അദ്ദേഹത്തിന്റെ ജീവന്‍ രക്ഷിക്കാന്‍ ഉടന്‍ തന്നെ വൈദ്യസഹായങ്ങള്‍ നല്‍കിയെങ്കിലും എല്ലാം വിഫലമായി.
ഡേവിഡിന്റെ മരണത്തില്‍ പാര്‍ലമെന്‍റിലെ മറ്റു അംഗങ്ങള്‍ നടുക്കം രേഖപ്പെടുത്തി. മാസത്തിലെ ആദ്യത്തെയും മൂന്നാമത്തെയും വെള്ളിയാഴ്ച ഇദ്ദേഹം വോട്ടര്‍മാരുമായി പതിവായി കൂടിക്കാഴ്ച നടത്തിയിരുന്നു. 1983ല്‍ ബാസില്‍ഡണിനെ പ്രതിനിധീകരിച്ചാണ് ഡേവിഡ് ആദ്യമായി പാര്‍ലമെന്‍റിലെത്തുന്നത്. 1997ല്‍ സൗത്ത്ഹെന്‍ഡ് വെസ്റ്റിലേക്ക് തട്ടകം മാറ്റി.
