കീഴ്മാട് : അനധികൃതമായി മണല് കൊണ്ടുപോകുന്നതിനിടെ മിനി ലോറി തകരാറിലായതിനെ തുടര്ന്ന് മണല് കടത്തുകാര് പോലീസ് പിടിയിലായി. തോട്ടുമുഖം മഹിളാലയം കവലക്ക് സമീപമാണ് സംഭവം. പുഴയോട് ചേര്ന്ന ആളൊഴിഞ്ഞ പുരയിടം വഴി മിനി ലോറി കൊണ്ടുവന്നാണ് പെരിയാറില് നിന്ന് മണല് കയറ്റിക്കൊണ്ടുപോകാന് ശ്രമിച്ചത്.
വ്യാഴാഴ്ച്ച അര്ധരാത്രിയായിരുന്നു മണല് കടത്ത്. ഇവിടെ നിന്ന് മെയിന് റോഡിലേക്കുള്ള ഇടവഴിയില് വെച്ച് ലോറിയുടെ ടയര് കുഴിയില് കുടുങ്ങുകയായിരുന്നു. ഇതേതുടര്ന്ന് ജെ.സി.ബി ഉപയോഗിച്ച് ലോറി പൊക്കിമാറ്റാന് ശ്രമിച്ചതോടെ ആക്സില് ഒടിഞ്ഞു. ഇതോടെ ലോറി ഇവിടെ കുടുങ്ങി. രാവിലെ ലോറിയും മണലും കണ്ട നാട്ടുകാര് പോലീസില് വിവരമറിയിച്ചു. പോലീസ് വന്ന് മണല് ഇറക്കിയ ശേഷം ലോറി ശരിപ്പെടുത്തുകയും മണലും ലോറിയും കസ്റ്റഡിയില് എടുക്കുകയുമായിരുന്നു.
പെരിയാറില് മണല്വാരല് നിര്ബാധം തുടരുന്നതായി കാലങ്ങളായി ആരോപണമുണ്ട്. രാത്രികാലങ്ങളില് മണല്വാരല് നിത്യേന നടക്കുന്നുണ്ട്. ഈ വിവരം പോലീസ് അധികാരികളെ അറിയിക്കുന്നുണ്ടെങ്കിലും യാതൊരു നടപടിയും ഉണ്ടാകാറില്ല. ബോട്ട് സംവിധാനം ഇല്ലാത്തതുകൊണ്ട് നടപടിയെടുക്കാന് സാധ്യമല്ല എന്നാണ് അധികാരികള് പറയുന്നത്. മണല് മാഫിയകള്ക്കെതിരെ ശക്തമായ നടപടിയെടുക്കണമെന്ന് എഡ്രാക്ക് കീഴ്മാട് പഞ്ചായത്ത് കമ്മിറ്റി പ്രസിഡന്റ് കെരീം കല്ലുങ്കല് ഡിവൈ.എസ്.പിയോട് ആവശ്യപ്പെട്ടു. പെരിയാറിനെ സംരക്ഷിക്കുന്ന കാര്യത്തില് അതീവ ജാഗ്രത വേണമെന്നും അദ്ദേഹം പറഞ്ഞു.
