പാലക്കാട്: പിഎം ശ്രീ പദ്ധതിയിൽ നിന്ന് സംസ്ഥാനങ്ങൾക്ക് പിന്മാറാമെന്ന് കേന്ദ്ര സർക്കാർ രാജ്യസഭയിൽ വ്യക്തമാക്കിയതിന് പിന്നാലെ യു ഡി എഫ് എംപി മാർക്കെതിരെ പരിഹാസവുമായി സി.പി.ഐ.എം നേതാവ് എം.ബി രാജേഷ്. പി എംശ്രീ വിഷയത്തിലെ യു ഡി എഫ് നുണകൾ ഒന്നൊന്നായി പൊളിച്ചടുക്കിയ ലീഗിൻ്റെ എംപി വഹാബിനും കോൺഗ്രസ് എംപി ജെബി മേത്തർക്കും ഒരു ലോഡ് അഭിനന്ദനമെന്ന് ഫേസ്ബുക്ക് പോസ്റ്റിൽ കുറിച്ചു. എൽ.ഡി.എഫ് സർക്കാർ പി എംശ്രീയിൽ ഒപ്പിട്ട് പണം വാങ്ങിയതിനാൽ ഇനി പിൻമാറാനാവില്ല എന്ന യു ഡി എഫ് നുണയാണ് പാർലമെന്റിൽ ഇവർ പൊളിച്ചടുക്കിയത്.
കേരളത്തിന് കൊടുത്തത് വിദ്യാഭ്യാസ അവകാശനിയമപ്രകാരം അവകാശപ്പെട്ട സമഗ്ര ശിക്ഷാ കേരളയുടെ 99.27 കോടി മാത്രമാണെന്ന് വ്യക്തമാക്കിയ മന്ത്രി ജയന്ത് ചൗധരി പദ്ധതിയിൽ ഉൾപ്പെടുത്തേണ്ട സ്കൂളുകളുടെ ലിസ്റ്റ് എൽഡി എഫ് സർക്കാർ നൽകിയിരുന്നില്ലെന്നും ജെബിക്ക് മറുപടി കൊടുത്തു. ഇതോടെ പി എം ശ്രീയിൽ നിന്ന് പിൻമാറാൻ സംസ്ഥാനങ്ങൾക്ക് തടസമില്ലെന്ന് വ്യക്തമായി. ഒടുവിൽ യു ഡി എഫ് എംപി മാരെക്കൊണ്ട് ഗുണമുണ്ടായിരിക്കുന്നുവെന്ന് പരിഹസിച്ച അദ്ദേഹം “Thank you guys.” എന്നും പോസ്റ്റിൽ വ്യക്തമാക്കി.
