റാന്നി : ആക്രിക്കടയിലും കഷ്ടമായി റാന്നി താലൂക്ക് സിവില് സപ്ലൈസ് ഓഫീസ്. ഓഫീസ് നവീകരണത്തെ തുടര്ന്ന് ഉപയോഗശൂന്യമായ ഫര്ണ്ണിച്ചറുകളും കാലഹരണപ്പെട്ട ഫയലുകളും വരാന്തയില് സൂക്ഷിക്കാന് തുടങ്ങിയിട്ട് നാളുകളേറെയായി. ജീവനക്കാര്ക്കും വിവിധ ആവശ്യങ്ങള്ക്കെത്തുന്ന ജനങ്ങള്ക്കും ഒരുപോലെ ബുദ്ധിമുട്ടുണ്ടാക്കും വിധം മുന് വാതിലിന്റെ പരിസരത്തും വരാന്തയിലുമാണ് ഇതൊക്കെ കൂട്ടിയിട്ടിരിക്കുന്നത്.
സിവില് സ്റ്റേഷന്റെ ഒന്നാം ബ്ലോക്കിലാണ് താലൂക്ക് സപ്ലൈ ഓഫീസ് പ്രവര്ത്തിക്കുന്നത്. പരിമിതമായ സ്ഥലമാണ് ഇവിടെയുള്ളത്. ഇവിടെയാണ് ഇവ കൂട്ടി ഇട്ടിരിക്കുന്നത്. ഓഫീസില് മുമ്പ് ഉപയോഗിച്ചിരുന്ന പഴയ സാധനങ്ങള് നീക്കം ചെയ്യാന് നടപടി ആവശ്യപ്പെട്ട് മേലധികാരികള്ക്ക് കത്ത് നല്കിയെങ്കിലും മുകളിലെ സാറന്മാര് അനങ്ങിയിട്ടില്ല. പരാതി പറഞ്ഞ് ജീവനക്കാരും മടുത്തു.
