ഡൽഹി: കഴിഞ്ഞ ഫെബ്രുവരിയിലാണ് സർക്കാർ ഉടമസ്ഥതയിലുള്ള ടെലികോം കമ്പനിയായ ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ) 499 രൂപയുടെ ഭാരത് ഫൈബർ ബ്രോഡ്ബാൻഡ് പ്ലാൻ അവതരിപ്പിച്ചത്. 20Mbps സ്പീഡിൽ 100 ജിബി ഡാറ്റയാണ് ഈ പ്രൊമോഷണൽ പ്ലാനിൽ ലഭിക്കുന്നത്. എന്നാൽ ലോഞ്ച് സമയത്ത് 2020 മാർച്ച് 31 വരെ മാത്രം ലഭ്യമാകുമെന്ന് അറിയിച്ചിരുന്ന ഈ ഭാരത് ഫൈബർ ബ്രോഡ്ബാൻഡ് പ്ലാൻ ഇപ്പോൾ 2020 ജൂൺ 29 വരെ ലഭ്യമാകും എന്നറിയിച്ചിരിക്കുകയാണ് കമ്പനി.
കൊറോണ വൈറസ് വ്യാപനത്തെത്തുടർന്ന് ഡാറ്റ ഉപഭോഗം വർധിച്ച സാഹചര്യത്തിലാണ് ബിഎസ്എൻഎല്ലിന്റെ പുതിയ നീക്കം. ആൻഡമാൻ നിക്കോബാർ ഒഴിച്ച് ബിഎസ്എൻഎൽ ഭാരത് ഫൈബർ ബ്രോഡ്ബാൻഡ് സേവനം ലഭ്യമാകുന്ന എല്ലാ സർക്കിളുകളിലും ഈ പ്ലാൻ ലഭിക്കും. ബിഎസ്എൻഎൽ വെബ്സെെറ്റിൽ നിന്നും 499 രൂപയുടെ പ്ലാൻ തിരഞ്ഞെടുക്കാൻ കഴിയും. ഒരു മാസമാണ് പ്ലാനിന്റെ കാലാവധി. ബിഎസ്എൻഎൽ ഒരു ബഡ്ജറ്റ് പ്ലാൻ എന്ന നിലയിലാണ് 499 രൂപയുടെ ഭാരത് ഫൈബർ പ്ലാൻ അവതരിപ്പിച്ചത്.
ഭാരത് ഫൈബർ ലൈനപ്പിന്റെ ഭാഗമായതിനാൽ തന്നെ 499 രൂപയുടെ പ്ലാനിലൂടെ ബിഎസ്എൻഎല്ലിന്റെ ലാൻഡ്ലൈൻ സേവനം വഴി അൺലിമിറ്റഡ് വോയ്സ് കോളിംഗ് ആനുകൂല്യവും കമ്പനി നൽകുന്നുണ്ട്. 100 ജിബിയുടെ ഡെയ്ലി ഡാറ്റ ലിമിറ്റ് കഴിഞ്ഞാൽ ഉപയോക്താക്കൾക്ക് 2 Mbps വേഗതയിലുള്ള ഇന്റർനെറ്റ് ലഭിക്കും. ഈ കുറഞ്ഞ വേഗതയിലുള്ള ഇന്റർനെറ്റ് ബ്രൌസിങിന് പരിധികളൊന്നും ഇല്ല. അൺലിമറ്റഡ് ഡാറ്റ ഡൌൺലോഡും ഏത് നെറ്റ് വർക്കിലേക്കും അൺലിമിറ്റഡ് ലോക്കൽ + എസ്ടിഡി കോളുകളും ഈ പ്ലാൻ റീചാർജ് ചെയ്തവർക്ക് ലഭിക്കും. ഈ പോർട്ട്ഫോളിയോയിലുള്ള മറ്റ് പ്ലാനുകളെപ്പോലെ ആമസോൺ പ്രെെം സബ്സ്ക്രിപ്ഷൻ 499 രൂപ പ്ലാനിൽ ലഭിക്കില്ല. 999 രൂപയുടെ ബ്രോഡ്ബാൻഡ് പ്ലാനിനൊപ്പം ആമസോൺ പ്രെെം സബ്സ്ക്രിപ്ഷൻ ബിഎസ്എൻഎൽ നൽകുന്നുണ്ട്.
