കൊറിയൻ സംഗീതബാൻഡ് ബിടിഎസിന്റെ പുതിയ വെളിപ്പെടുത്തൽ ആരാധകവൃന്ദത്തെ നിരാശയിലാഴ്ത്തുകയാണ്. പുറത്തിറക്കാൻ തയ്യാറാക്കി വെച്ചിരുന്ന പാട്ടിന്റെ ഫയൽ നഷ്ടപ്പെട്ടു പോയി എന്ന വിവരമാണ് ഇപ്പോൾ ബാൻഡ് പുറത്തു വിട്ടത്. ബിടിഎസ് താരം ആർഎം ആണ് ഇക്കാര്യം കടുത്ത നിരാശയോടെയും ദുഃഖത്തോടെയും ലോകത്തെ അറിയിച്ചത്.
കമ്പ്യൂട്ടറിലെ ചില ഡോക്യുമെന്റുകൾ നീക്കം ചെയ്യുന്നതിനിടെ അബദ്ധത്തിൽ പുതിയ പാട്ടിന്റെ ഫയലുകളും ഡിലീറ്റ് ആയിപ്പോയി എന്ന് ആർഎം വെളിപ്പെടുത്തി. പൂർണമായും തന്റെ ഭാഗത്തു നിന്നുണ്ടായ തെറ്റാണതെന്നു സമ്മതിച്ചുകൊണ്ട് താരം സമൂഹമാധ്യമങ്ങളിൽ കുറിപ്പും പങ്കുവവെച്ചിട്ടുണ്ട്. ആ പാട്ട് നശിച്ചു പോയി എന്നും ഇനിയൊരു വീണ്ടെടുപ്പില്ല എന്നും കുറിച്ച ആർഎംം, തന്റെ ജീവിതത്തിലെ ഏറ്റവും മോശം ദിവസമായിരുന്നു അതെന്നും പറഞ്ഞു.
പാട്ടിന്റെ അറുപതോളം ഓഡിയോ ട്രാക്കുകളും നഷ്ടപ്പെട്ടെന്നും അതുകൊണ്ടു തന്നെ ഇനി ആ പാട്ടിനെ പുനസൃഷ്ടിക്കുക സാധ്യമല്ലെന്നും താരം പറഞ്ഞു. ലക്ഷങ്ങൾ വിലയുള്ള പാട്ടുകൾ സൃഷ്ടിക്കുന്ന ഗായകനും സംഗീത സംവിധായകനുമായ ആർഎമ്മിന്റെ നിരാശയോടെയുള്ള വാക്കുകൾ ചുരുങ്ങിയ സമയത്തിനകം ആരാധകർക്കിടയിൽ ചർച്ചാ വിഷയമായി. നിരവധി പേരാണ് ആശ്വാസവാക്കുകളുമായി സമൂഹമങ്ങളിലൂടെയും അല്ലാതെയും എത്തുന്നത്.
