പാലക്കാട്: പ്രതിഷേധത്തില് മുങ്ങി പാലക്കാട് നഗരസഭാ ബജറ്റ് അവതരണം. ബജറ്റ് കീറിയെറിഞ്ഞും കത്തിച്ചും പ്രതിപക്ഷ പ്രതിഷേധം ആളിക്കത്തി. ബജറ്റ് അവലോകന റിപ്പോര്ട്ട് മുന്കൂറായി നല്കിയില്ല എന്ന് പറഞ്ഞായിരുന്നു പ്രതിപക്ഷം പ്രതിഷേധവുമായി രംഗത്ത് എത്തിയത്. ബജറ്റ് ചര്ച്ചയിലും പ്രതിഷേധം തുടരാനാണ് പ്രതിപക്ഷ തീരുമാനം. ബജറ്റ് അവതരിപ്പിക്കാന് നഗരസഭാ ഉപാധ്യക്ഷന് എഴുന്നേറ്റതും ചെയറിന് മുമ്പില് വട്ടംകൂടി ബഹളം വച്ചു. ബഹളത്തിനിടയിലും ഇ കൃഷ്ണദാസ് ബജറ്റ് അവതരണവുമായി മുന്നോട്ട് പോയതോടെ പ്രതിഷേധം കടുക്കുകയായിരുന്നു.
അതേസമയം ആവശ്യമെങ്കില് ഒരു നാള് അധികം ബജറ്റ് ചര്ച്ച ചെയ്യാമെന്ന് നാഗരസഭ അധ്യക്ഷ പ്രിയ അജയന് പറഞ്ഞെങ്കിലും പ്രതിപക്ഷം പിന്വാങ്ങിയില്ല. വികസന വിരോധമാണ് പ്രതിഷേധത്തിന് കാരണമെന്ന് ഭരണ സമിതി ആരോപിച്ചു. കീഴ് വഴക്കം അനുസരിച്ചുള്ള ബജറ്റ് അവലോകന റിപ്പോര്ട്ട് നല്കിയില്ലെന്നാണ് പ്രതിപക്ഷത്തിന്റെ പരാതി.
