കോഴിക്കോട് : നാദാപുരത്ത് പോത്തിനെ ഓട്ടോയില് കെട്ടിവലിച്ച സംഭവത്തില് രണ്ട് പേര് അറസ്റ്റില്. അറവുശാല ഉടമകളായ ബീരാന്, ഇസ്മായില് എന്നിവരെയാണ് അറസ്റ്റ് ചെയ്തത്. കഴിഞ്ഞ ദിവസമാണ് ഇവര് പോത്തിനെ ഓട്ടോയില് കെട്ടി കിലോമീറ്ററുകളോളം വലിച്ചുകൊണ്ടു പോയത്.
അപകടമുണ്ടാക്കും വിധം വാഹനമോടിച്ചതിനും, മൃഗങ്ങളെ മനപൂര്വ്വം കൊല്ലാന് ശ്രമിച്ചതിനുമാണ് കേസ് എടുത്തത്. ഇതിന് പുറമേ അറിഞ്ഞുകൊണ്ട് പൊതുജനങ്ങള്ക്ക് ഉപദ്രവമുണ്ടാക്കാന് ശ്രമിച്ചതിനും കേസ് എടുത്തിട്ടുണ്ട്. രണ്ട് പേരെയും ഇന്ന് കോടതിയില് ഹാജരാക്കും. കശാപ്പിന് കൊണ്ടുപോകുമ്പോഴാണ് പോത്തിനെ ഇവര് കെട്ടിവലിച്ചത്. വഴിയാത്രക്കാരില് ഒരാള് ഇതിന്റെ ദൃശ്യങ്ങള് പകര്ത്തി സമൂഹമാദ്ധ്യമങ്ങളില് പങ്കുവെയ്ക്കുകയായിരുന്നു. ഇതോടെയാണ് സംഭവം പുറത്തറിഞ്ഞത്.